Taıaý Shyǵystaǵy soǵys órti barlyq el men kontınentti sharpymaı turǵanda toqtaǵany jón – QR Prezıdenti
Memleket basshysy Qasym-Jomart Toqaev búgin UQShU Ujymdyq qaýipsizdik keńesiniń shaǵyn quramda ótken sessııasynda sóılegen sózinde búgingi sessııannyń halyqaralyq ahýal kúrt nasharlaǵan óte qıyn jaǵdaıda ótip jatqanyna nazar aýdardy.
Bul týraly Kazinform Aqordanyń resmı saıtyna silteme jasap habarlaıdy.
Prezıdent Eýrazııa qurlyǵyndaǵy jáne UQShU jaýapkershiligine kiretin aımaq tóńireginde kúrdeli jaǵdaı qalyptasyp otyrǵanyn atap ótti.
Memleket basshysynyń pikirinshe, Taıaý Shyǵystaǵy oqıǵalardyń aýjaıy da erekshe alańdaýshylyq týǵyzady.
– Qaqtyǵystan beıbit halyq zardap shegip otyr. Qanshama jazyqsyz adam, balalar qaza tapty. Mundaıǵa beı-jaı qaraý múmkin emes. Qazaqstan Gaza turǵyndaryna bir mıllıon dollar kóleminde gýmanıtarlyq kómek kórsetti. Qarjy BUU qurylymy – UNRWA/BAPOR uıymy arqyly jiberildi. Qaqtyǵys kezinde bul uıymnyń qyzmetkerleri óte kóp shyǵynǵa ushyraǵanyna qaramastan, jumysyn erlikpen jalǵastyryp jatyr. Taıaý Shyǵystaǵy qaqtyǵys, shyn máninde, jahandyq aýqymdaǵy aqparattyq-ıdeologııalyq teketiresti ábden shıryqtyryp jiberdi. Gaza sektory tóńireginde bolyp jatqan oqıǵalar álemdik qoǵamdastyqty ekige jardy. Soǵys órti barlyq el men kontınentti sharpymaı turǵanda toqtaǵany jón, – dedi Prezıdent.
Memleket basshysy Qazaqstannyń ýaqytsha bitim jasaý týraly sońǵy kelisimdi quptaıtynyn málimdedi.
– Biz áýel bastan qaqtyǵysýshy taraptardyń gýmanıtarlyq úzilis jarııalaýy kerek ekenin aıttyq. Olar osy ýaqytty qalyptasqan jaǵdaıdy retteýdiń uzaqmerzimdi sharalaryn ázirleýge paıdalaný úshin bar kúsh-jigerin jumsaýy qajet. Buǵan qosa, BUU aıasynda palestınalyqtarǵa «Eki halyq úshin eki memleket» formýlasyna saı tolyqqandy memleket qurý quqyǵyn bergen jón. Osyndaı qıyn jaǵdaıda BUU Qaýipsizdik Keńesiniń qararyn múltiksiz oryndap, halyqaralyq quqyq normalaryn saqtaý mańyzdy, – dedi Qasym-Jomart Toqaev.
