2,1 myńnan astam bala Taıaý Shyǵystaǵy shıelenistiń zardabyn tartty — ıÝNISEF
ASTANA. KAZINFORM - Taıaý Shyǵystaǵy áskerı shıelenis bastalǵaly beri 2,1 myńnan astam bala mert bolǵan jáne jaralanǵan. Bul týraly ıÝNISEF atqarýshy dırektorynyń orynbasary Ted Chaıban málimdedi, dep habarlaıdy Kazinform.
— Qaqtyǵys saldarynan 2,1 myńnan astam bala qyrshynynan qıyldy. Atap aıtqanda Iranda 206 bala, Lıvanda - 118, Izraılde – tórt, Kýveıtte bir bala mert boldy. Bul — resmı derekter, al zorlyq-zombylyq jalǵasqan saıyn zardap shekkender sany arta beredi. Orta eseppen kúnine shamamen 87 bala zardap shegedi, — dedi ol Nıý-Iorktegi BUU shtab-páterinde jýrnalısterge bergen suhbatynda.
Ol jaǵdaıdyń odan ári ýshyǵý qaýpi bar ekenin eskertti.
— Qaqtyǵystyń keńeıýi nemese sozylýy mıllıondaǵan adam úshin apatqa aınalady, — dedi Ted Chaıban.
Shıelenis halyqtyń jappaı qonys aýdarýymen qatar júrip jatyr. Iranda májbúrli túrde kóshkenderdiń sany 3,2 mln adamǵa jetti, onyń 864 myńǵa jýyǵy — balalar. Lıvanda 1 mln-nan astam adam, onyń ishinde shamamen 370 myń bala úılerin tastap ketken. Kóptegen otbasy mektepter men basqa da qoǵamdyq ǵımarattarǵa ornalastyrylǵan. Bosqyndardyń bir bóligi, sonyń ishinde shamamen 90 myń sırııalyq, Sırııaǵa qaıta oralǵan.
Qazirgi shıeleniske deıin-aq óńirde shamamen 44,8 mln bala qaqtyǵys jaǵdaıynda ómir súrip kelgen. Keıingi oqıǵalar olardyń jaǵdaıyn odan ári aýyrlata tústi.
Turǵyn úıler, mektepter men medıtsına mekemeleri zaqymdanǵan nemese qıraǵan. Densaýlyq saqtaý júıeleri shamadan tys júktememen jumys isteýde, gýmanıtarlyq kómek jetkizý tizbegi buzylǵan.
Lıvandaǵy daǵdarys uzaqqa sozylǵan ekonomıkalyq qıyndyqtar aıasynda órship jatyr. Kóptegen otbasy qaıtadan kóshýge májbúr bolyp, tolyp ketken panalaý oryndaryna nemese aıaqtalmaǵan ǵımarattarǵa ornalastyrylyp jatyr.
350-den astam memlekettik mektep ýaqytsha ornalastyrý pýnkti retinde paıdalanylyp, shamamen 100 myń balanyń oqý protsesi úzilgen. Qashyqtan oqytýǵa kóshý áreketteri qaýipsiz ári turaqty orta qalyptastyra almaı otyr.
Lıvanda shıelenis bastalǵaly beri 118 bala mert bolyp, 372-si jaralanǵan — bul elde kún saıyn bir synyptaǵy balalar sanyna teń kórsetkishte bala qurban bolady nemese jaraqat alady.
Memlekettik qyzmetterge túsetin júkteme kúrt artqan: sýmen jabdyqtaý júıeleri zaqymdanǵan, mert bolǵandar arasynda medıtsına qyzmetkerleri de bar.
ıÝNISEF 250-den astam ornalastyrý pýnktinde 151 myń qonys aýdarǵan adamǵa kómek kórsetti. Olarǵa aýyzsý, sanıtarlyq jaǵdaı jáne birinshi kezekte qajetti zattar jetkizilgen. Elge azyq-túlik pen balalarǵa arnalǵan arnaıy taǵam jetkizilip, 13 myńnan astam bala oqý quraldarymen qamtyldy, al jaralanǵandardyń bir bóligine medıtsınalyq kómek kórsetildi.
Uıym ókilderi soǵys qımyldaryn dereý toqtatýǵa, gýmanıtarlyq kómekti ońaltaýǵa jáne zardap shekkenderge bólinetin qarjyny arttyrýǵa shaqyrdy.
Osyǵan deıin uıym ókilderi Irandaǵy soqqylardan da balalardyń zardap shegip jatqany týraly jazǵan edi.
