Taıaý Shyǵystaǵy shıelenis kúsheıgen saıyn munaı da qymbattap barady
ALMATY. KAZINFORM – Taıaý Shyǵystaǵy shıelenistiń kúsheıýine baılanysty álemdik munaı naryǵynda baǵa qaıta óse bastady.
Dúısenbi kúni Brent markaly munaıdyń quny bir barrel úshin 93 dollarǵa kóterilip, 2 paıyzdan astam ósti.
Al WTI markaly munaıdyń baǵasy 89 dollardan asyp, shamamen 3 paıyz qymbattady.
Naryqtaǵy ósimge álemdik energııa resýrstary jetkizilimine qatysty alańdaýshylyq sebep bolyp otyr. Sonymen qatar Izraıldiń Lıvan aýmaǵyna jasaǵan áýe shabýyldary týraly habarlar da munaı baǵasynyń kóterilýine yqpal etti.
Buǵan deıin Iran men AQSh-tyń kelisimge kelýge jaqyn qalǵany habarlanǵan edi. Alaıda juma kúni ótken kezdesýdiń qorytyndysy boıynsha qujatqa qol qoıylmady. Kelisim bitim merzimin uzartýdy jáne Ormýz buǵazy arqyly keme qatynasyn tolyq qalpyna keltirýdi kózdeıdi.
Sondaı-aq Irannyń Ormýz buǵazyndaǵy qozǵalysty retteýdiń jańa tetigi jóninde Omanmen kelissózder júrgizip jatqany belgili boldy.
Al Reseıdiń Urals markaly munaıynyń baǵasy tómendep jatyr. Saýda derekterine sáıkes, qazirgi ýaqytta bul munaıdyń bir barreliniń quny – 82 dollar. Keıingi bir aıda onyń baǵasy 25 paıyzdan astam tómendegen.
Eske salaıyq, buǵan deıin Brent munaıynyń baǵasy 11 mamyrdan beri alǵash ret 99 dollardan tómen túskenin habarlaǵanbyz.
