Taıaý Shyǵystaǵy shıelenis: Dýbaıdan qazaqstandyq týrısterdi jetkizgen eki ushaq Almatyǵa qondy

ALMATY. KAZINFORM – FlyDubai áýe kompanııasynyń eki reısi qazaqstandyq týrısterdi bortpen Almatyǵa jetkizdi, dep habarlaıdy QR Týrızm jáne sport mınıstrliginiń baspasóz qyzmeti.

Eske sala keteıik, 13 maýsymda Taıaý Shyǵystaǵy jaǵdaıdyń ýshyǵýyna baılanysty birqatar áýe kompanııasy Dýbaı men Abý-Dabıden aımaqtarǵa, onyń ishinde Qazaqstanǵa reısterdi ýaqytsha toqtatqan bolatyn.

Buǵan deıin QR Kólik mınıstrliginiń Azamattyq avıatsııa komıteti Iran, Izraıl, Sırııa, Irak, Iordanııa jáne Lıvannyń áýe keńistigi men oǵan jaqyn aýmaqtarǵa ushýǵa tolyq tyıym salǵanyn habarlaǵan edi. Bul shekteý arnaıy buıryq shyqqanǵa deıin kúshinde bolady.

FlyDubai kompanııasynyń búgin saǵat 2:45 pen 6:19-da qonǵan reısteri atalǵan aýmaqtardy aınalyp ótip, 13 maýsymda usha almaǵan 332 týrısti jáne josparly jolaýshylardy elge jetkizdi.

– 13 maýsymda Dýbaıdan usha almaǵan barlyq týrıster «Týrıstik Qamqor» qorynyń qatysýshy týroperatorlary tarapynan QR Týrızm jáne sport mınıstrligi, Syrtqy ister mınıstrligi men Qazaqstan Respýblıkasynyń Elshiliginiń úılestirýimen qonaqúılerge ornalastyryldy. Qazir olardyń elge qaıtýy josparlanyp jatyr, bir bóligi túngi reıstermen búgin elge oraldy, – dep málim etti Týrızm jáne sport mınıstrliginiń ókilderi.

Mınıstrlik buryn habarlaǵandaı, qazaqstandyq týrısterge Taıaý Shyǵystaǵy jaǵdaıdy muqııat baqylap, ásirese Birikken Arab Ámirlikteri men Parsy shyǵanaǵy elderine saparlaryn muqııat josparlaý usynylady.

– Týrızm jáne sport mınıstrligi jaýapty memlekettik organdarmen, elshiliktermen jáne týroperatorlarmen turaqty baılanysta. Qajet bolǵan jaǵdaıda mınıstrlik «Týrıstik Qamqor» jáne áýe kompanııalarmen birlese otyryp, týrısterdi elge qaıtarýdy qamtamasyz etedi, – delingen vedomstvo habarlamasynda.

Aıta keteıik, buǵan deıin alty qazaqstandyq Irannan Ázerbaıjan shekarasy arqyly evakýatsııalanǵan bolatyn.