Taıaý Shyǵystaǵy munaı tasymalyna qatysty qaýip baǵanyń ósýine túrtki boldy
ASTANA. KAZINFORM — 29 qyrkúıek tańerteń álemdik munaı baǵasy qatarynan ekinshi saýda sessııasynda qymbattaýyn jalǵastyrdy. Taıaý Shyǵystaǵy ahýal men AQSh pen Iran arasyndaǵy kelissózderdiń keleshegine qatysty belgisizdik munaı naryǵyndaǵy alańdaýshylyqty kúsheıtip otyr. Bul týraly Reuters habarlady.
Reuters agenttiginiń sońǵy málimetine sáıkes, Brent markaly munaıdyń baǵasy barreline 106,60 dollarǵa jetti. Azııalyq saýda sessııasynyń bastapqy kezeńinde onyń baǵasy 0,6 paıyz artyp, barreline 105,91 dollar deńgeıinde bolǵan.
Al amerıkalyq West Texas Intermediate (WTI) markaly munaıdyń baǵasy tańerteń 0,8% paıyzǵa kóterilip, barreline 93,32 dollarǵa jetti.
Munaı baǵasynyń ósýine óńirden munaı tasymalynyń úzilýi múmkin degen qaýiptiń seıilmeýi áser etip otyr.
Qyrkúıekte Taıaý Shyǵystaǵy iri munaı óndirýshilerdiń eksporty táýligine 12,8 mln barrelge deıin ósip, aqpan aıynan bergi eń joǵary kórsetkishke jetti. Alaıda munaı jetkizilimderiniń bir bóligi áli de kúrdeli ári qymbat logıstıkalyq baǵyttarǵa táýeldi.
Osy tusta naryq qatysýshylary AQSh pen Iran arasyndaǵy kelissózderdi qaıta bastaýǵa baǵyttalǵan áreketterdi de jiti baqylap otyr. Eki eldiń ókilderi deldaldarmen jeke-jeke konsýltatsııalar ótkizgenimen, ázirge kelissózderdiń naqty nátıjesi men mámilege kelý múmkindigi týraly anyq aqparat joq. Munaı naryǵy úshin mańyzdy faktorlardyń biri bolyp otyrǵan Ormýz buǵazy mańyndaǵy ahýal da nazardan tys qalmaıdy.
Buǵan deıin Kazinform munaı baǵasynyń keıingi bir aptadaǵy eń joǵary deńgeıge jetkenin habarlaǵan edi. Sol kezde naryq Taıaý Shyǵystaǵy jaǵdaıǵa jáne Vashıngton men Tegerannyń kelisimge kelýine qatysty úmitke nazar aýdarǵan bolatyn.
Aıta keteıik, Saýd Arabııasy munaıdy Qyzyl teńiz arqyly tasymaldaýdy qaıta bastady. Qubyr jelisiniń qaıta iske qosylýy elge Ormýz buǵazyn aınalyp ótip, Shyǵys provıntsııasyndaǵy ken oryndarynan Qyzyl teńiz jaǵalaýyndaǵy ıAnbý portyna munaı tasymaldaýǵa múmkindik beredi. Uzyndyǵy shamamen 1,2 myń shaqyrym bolatyn munaı qubyry táýligine 7 mln barrelge deıin munaı jetkizýge qaýqarly.
Buǵan deıin Ormýz buǵazy arqyly munaı jetkizýdiń buzylýy álemdik munaı naryǵyna tónetin táýekelderdi kúsheıtip, baǵanyń ózgerýine áser etkeni habarlanǵan edi.
Sonymen qatar AQSh prezıdenti Donald Tramp amerıkalyq taraptyń Ormýz buǵazy arqyly rekordtyq kólemde munaı jóneltkenin málimdedi. Onyń aıtýynsha, bul kólem Iranmen qaqtyǵys bastalǵanǵa deıin tirkelgen kórsetkishten asyp túsken.
