Taıaý Shyǵystaǵy qazaqstandyqtarǵa arnalǵan baılanys paketteri iske qosyldy

ASTANA. KAZINFORM – QR Jasandy ıntellekt jáne tsıfrlyq damý mınıstrligi Taıaý Shyǵys elderinde júrgen azamattardy qoldaý sharalary týraly habarlady.

Vedomstvo málimetinshe, qazirgi geosaıası jaǵdaıǵa baılanysty shetelde júrgen qazaqstandyqtardyń jaqyndarymen turaqty baılanysta bolyp, memleket qoldaýyn sezinýi asa mańyzdy.

Osyǵan oraı elimizdiń uıaly baılanys operatorlarymen birlesip, qysqa merzim ishinde arnaıy baılanys paketteri iske qosyldy. Bul paketter kórsetilgen elder aýmaǵynda bolǵan ýaqytta ınternet pen qońyraýlardy tegin paıdalanýǵa múmkindik beredi.

- Qoldaý sharalary týraly tolyq aqparatty mobıldi operatorlardyń resmı saıttarynan nemese mobıldi qosymshalar arqyly bilýge bolady.

Mınıstrlik baılanys operatorlaryna qoldaý sharalaryn jedel iske qosqany úshin alǵys bildirdi, - delingen aqparatta.

Sondaı-aq vedomstvo azamattardy Qazaqstan Respýblıkasynyń resmı qyzmetteri men elshilikteriniń usynymdaryn ustanýǵa, óz qaýipsizdigi men jaqyndarynyń amandyǵyna erekshe nazar aýdarýǵa shaqyrdy.

Mınıstrlik jaǵdaıdy turaqty baqylaýda ustap otyrǵanyn jáne seriktestermen birlesip, sheteldegi otandastarǵa turaqty baılanys pen qajetti qoldaý kórsetý baǵytyndaǵy jumysty jalǵastyratynyn málimdedi.

Aıta keteıik, Iranǵa jasalǵan shabýyl Taıaý Shyǵystaǵy áýe qatynasyn toqtatty.