Taıaý Shyǵystaǵy qaqtyǵystan Qazaqstanǵa qandaı táýekelder bar – Jumanǵarın pikiri

ASTANA. KAZINFORM — Premer-mınıstrdiń orynbasary – Ulttyq ekonomıka mınıstri Serik Jumanǵarın Taıaý Shyǵystaǵy qaqtyǵystyń elimizge qandaı áseri bolýy múmkin ekenin aıtty.

– Reseı men Ýkraına arasyndaǵy qaqtyǵys biraz ýaqyttan beri júrip jatyr. Logıstıka qaqtyǵysty eskere otyryp qalyptastyryldy. Al Parsy shyǵanaǵyna keler bolsaq, bul baǵyttaǵy logıstıka biz úshin basym bolǵan emes. Parsy shyǵanaǵyndaǵy porttardy, máselen, Bender-Abbas portyn, óte sırek paıdalandyq. Iá, jóneltilimder boldy. Biraq olar qazirgi tańda sheshýshi ról atqaratyndaı kólemde emes. Óıtkeni ol jaqqa jetýdiń ózi qıyn. Bul ınfraqurylymnyń jaı-kúıine baılanysty, tranzıt joly da uzaq. Araqashyqtyq qysqa kóringenimen, eki eldiń aýmaǵy arqyly ótý qajet jáne taǵy basqa máseleler bar. Sondyqtan logıstıkaǵa aıtarlyqtaı áser etedi dep oılamaımyn, – dedi vıtse-premer Májilistiń jalpy otyrysynan keıin.

Onyń paıymynsha, munaı baǵasynyń qubylmalylyǵy aıasynda teńge baǵamynyń ózgerýi negizgi táýekel bolýy yqtımal.

– Munaı baǵasynyń aýytqýy, árıne, valıýta baǵamyna jáne baǵam aıyrmasyna áser etedi. Sondyqtan baǵamnyń qubylmalylyǵy - jaqsy nárse emes, – dedi Serik Jumanǵarın.

Vıtse-premer qaqtyǵystyń teńge baǵamyna yqtımal áserin Úkimet pen Ulttyq bank birlesip qarastyratynyn atap ótti.

– Eger munaı baǵasy ósse, ádette teńge nyǵaıady, quldyramaıdy. Másele teńgeniń nyǵaıýy nemese álsireýinde emes. Másele qubylmalylyqta. Qubylmalylyq árdaıym alańdaýshylyq týdyrady. Bizge turaqtylyq qajet, – dedi ol.

Buǵan deıin Taıaý Shyǵystaǵy ahýalǵa baılanysty qansha otandasymyz elge oralǵanyn jazǵan edik.