Taıaý Shyǵystaǵy qaqtyǵysqa baılanysty altyn men kúmistiń baǵasy arzandady
ASTANA. KAZINFORM — Taıaý Shyǵystaǵy qaqtyǵys baǵaly metaldardyń baǵasyn qoldaýy tıis edi. Alaıda munaı baǵasy men paıyzdyq mólsherlemelerge qatysty alańdaýshylyq saldarynan kúmis 40%-ǵa deıin quldyrap, altyn da arzandap ketti. Bul týraly Euronews.com jazdy.
Sońǵy bir jylda altynnyń daǵdarys kezindegi «qaýipsiz aktıv» retindegi bedeli Taıaý Shyǵystaǵy qaqtyǵys kúsheıgen tusta álsiredi.
Dúısenbi kúni tańerteńgi saýda barysynda altynnyń spot baǵasy 2026 jyldan bergi eń tómen deńgeıge — shamamen ýntsııasyna 4 100 dollarǵa deıin tústi. Keıin AQSh prezıdenti Donald Tramp Irandaǵy elektr stantsııalaryna soqqy berýdi «óte jaqsy ári nátıjeli kelissózderden» keıin bes kúnge keıinge qaldyrǵanyn málimdegen soń, baǵa kúrt ósip, 4 400 dollardan asty. Osylaısha, nebári birneshe saǵat ishinde baǵa shamamen 300 dollarǵa qubyldy.
Soǵan qaramastan, qańtar aıynyń sońynan beri altyn 20%-dan astam arzandady. 29 qańtarda ol ýntsııasyna 5 594,82 dollar bolyp, rekordtyq deńgeıge jetken edi.
Kúmis te aıtarlyqtaı quldyrady: qańtardaǵy tarıhı maksımým — 121,67 dollardan beri onyń baǵasy shamamen eki ese tómendedi. Bul — sońǵy jyldardaǵy baǵaly metaldar naryǵyndaǵy eń kúrt quldyraýlardyń biri.
Kúmistiń spot baǵasy 8,9%-ǵa tómendep, 61,76 dollarǵa deıin tústi. Bul — jyl basynan bergi eń tómen kórsetkish jáne 28 aqpanda, Iranmen qaqtyǵys bastalǵan kezdegi 117 dollardan eki esege jýyq tómen.
Bastapqyda túsiniksiz kórinetin bul jappaı satylym ınvestorlardy alańdatty. Sebebi olar baǵaly metaldardy turaqty aktıv retinde senip satyp alǵan bolatyn.
Buǵan deıin Donald Tramptyń Iranǵa soqqylardy ýaqytsha toqtatý týraly málimdemesi munaı baǵasynyń da tómendeýine áser etken edi.
