Taıaý Shyǵystaǵy qaqtyǵys saldarynan gaz baǵasy kúrt ósti
ASTANA. KAZINFORM — Taıaý Shyǵysta energetıkalyq ınfraqurylymǵa jasalǵan shabýyldardyń kúsheıýine baılanysty beısenbi kúni munaı men tabıǵı gaz baǵasy kúrt kóterildi.
Iran tarapynan aımaqtaǵy energetıkalyq nysandarǵa soqqylar kúsheıip, Katardaǵy suıytylǵan tabıǵı gaz (SPG) óndiretin álemdegi eń iri zaýyttardyń birine shabýyl jasalǵan.
Brent markaly munaı baǵasy aldyńǵy kúngi ósimin jalǵastyryp, 6%-dan astamǵa qymbattap, barreline 114 dollardan asty. Al WTI markaly munaı baǵasy beısenbi kúni 0,5%-ǵa ósip, barreline shamamen 96 dollar boldy.
Eýropada tabıǵı gaz baǵasy bir kúnde 16,7%-ǵa ósip, eń joǵary deńgeıde 25%-ǵa deıin jetken. Jalpy, 28 aqpannan, ıaǵnı qaqtyǵys bastalǵaly beri gaz baǵasy shamamen eki esege artqan, dep jazady CNN.
QatarEnergy kompanııasy sársenbi kúni Ras-Laffan STB haby zymyrandyq shabýyldardan «aıtarlyqtaı zaqymdanǵanyn» habarlady. Halyqaralyq energetıkalyq agenttik málimetinshe, Ras-Laffan – álemdegi eń iri STB óndirý zaýyty.
Aıta ketý kerek, Ras-Laffan álemdegi suıytylǵan gazdyń shamamen 25%-yn óndiredi. Onyń 80%-y Azııaǵa jóneltiledi, al Pákistan sııaqty keıbir elder qatarlyq gazǵa derlik tolyq táýeldi.
Wood Mackenzie taldaý kompanııasynyń málimetinshe, Iran soqqylarynan keıin Ras-Laffan habyna kelgen zııan «álemdik gaz naryǵynyń bolashaǵyn túbegeıli ózgertedi». Kompanııa beısenbi kúngi esebinde tabıǵı gaz jetkizilimindegi irkilister eki aıdan astam ýaqytqa sozylýy múmkin ekenin atap ótti.
— Mundaı uzaqqa sozylǵan gaz úzilisi tabıǵı gaz baǵasynyń uzaq ýaqyt boıy joǵary deńgeıde qalýyna sebep bolady, — dep jazdy Wood Mackenzie SPG strategııasy bóliminiń basshysy Krıstı Kramer.
QatarEnergy 2 naýryzda Iran shabýylynan keıin STG óndirisin toqtatqannan beri álemdik STG jetkizilimi shamamen besten birge qysqarǵan.
Buǵan deıin Izraıl álemdegi eń iri gaz ken oryndarynyń biri – «Ońtústik Pars» ken ornyna soqqy jasaǵan bolatyn.
