Taıaý Shyǵystaǵy qaqtyǵys: Qyrǵyzstan óz azamattaryn evakýatsııalaý týraly kelissóz júrgizip jatyr

ASTANA.KAZINFORM - Qyrǵyzstan Syrtqy ister mınıstrligi prezıdenttiń tapsyrmasy boıynsha Saýd Arabııasy, BAÁ jáne Omanmen qyrǵyz azamattaryn evakýatsııalaý reısterin uıymdastyrý boıynsha kelissóz júrgizip jatyr, dep habarlaıdy Kazinform agenttiginiń Bishkektegi tilshisi.

Sadyr Japarov óziniń Facebook paraqshasynda Taıaý Shyǵystan Oman arqyly 300 qyrǵyzstandyq evakýatsııalanyp jatqanyn jarııalady.

- Taıaý Shyǵys elderi úılerine orala almaıtyn azamattardy evakýatsııalaý boıynsha úzdiksiz jumys istep jatyr. Birikken Arab Ámirlikterinde ushý-qonýǵa tyıym salynǵandyqtan, Omanmen 300 adamdy evakýatsııalaý úshin eki charterlik reıs uıymdastyrý týraly kelisimge qol jetkizildi. Aldymen áıelder men balalar evakýatsııalanady. Biz barlyǵyn sabyr saqtaýǵa jáne ustamdylyq tanytýǵa shaqyramyz, - dep jazdy prezıdent.

Onyń aıtýynsha, eger BAÁ-den ushýǵa ruqsat berilse, qalǵan barlyq azamatty bir kún ishinde evakýatsııalaýǵa bolady.

Qyrǵyzstan Respýblıkasynyń Syrtqy ister mınıstrligi Taıaý Shyǵys elderindegi qyrǵyz azamattaryn saqtyq sharalaryn kúsheıtýge, kóp adam jınalatyn jerlerden jáne qaýipti aımaqtardan aýlaq bolýǵa jáne jergilikti bılik organdary men quqyq qorǵaý organdarynyń qaýipsizdik talaptaryn qatań saqtaýǵa shaqyrdy. Sondaı-aq, olarǵa árqashan jeke basyn kýálandyratyn qujattar men dıplomatııalyq mıssııanyń baılanys aqparatyn alyp júrýge jáne resmı habarlandyrýlardy baqylaýǵa keńes beriledi.

Aıta keteıik, FlyDubai áýe kompanııasy Dýbaıdan Almaty men Astanaǵa 306 jolaýshyny jetkizdi.