BQO-da qazaq teatryn jóndeýge 1 mlrd teńgege jýyq qarjynyń artyq qaralǵany anyqtaldy
ORAL. KAZINFORM – BQO boıynsha sybaılas jemqorlyqqa qarsy qyzmet memlekettik satyp alý kezinde 1 mlrd teńgege jýyq qarajattyń tıimsiz jumsalýyna jol bermedi.
Sybaılas jemqorlyqqa qarsy is-qımyl agenttigi BQO boıynsha departamentiniń baspasóz qyzmetinen málim etkenindeı, basym baǵyttyń biri — memlekettik satyp alýlardyń sybaılas jemqorlyqqa qarsy monıtorıngi, atap aıtqanda, satyp alynatyn taýarlarǵa, jumystarǵa jáne kórsetiletin qyzmetterge josparly baǵalardyń joǵarylaý jaǵdaılaryn anyqtaý.
— Monıtorıng barysynda memlekettik satyp alý portalynda H.Bókeeva atyndaǵy BQO qazaq drama teatrynyń ǵımaratyn kúrdeli jóndeýge josparlanǵan 2,9 mlrd teńge mólsherindegi smetanyń asyra baǵalanǵany anyqtaldy. Departamenttiń usynysymen ýákiletti memlekettik organ atalǵan jobany qaıta qarap, tıisti ózgerister engizdi, bul 980 mln astam teńge bıýdjet qarajatynyń tıimsiz jumsalýyn boldyrmaýǵa múmkindik berdi, — dep habarlady vedomstvodan.
BQO mádenıet, tilderdi damytý jáne arhıv isi basqarmasy basshysynyń orynbasary Jeńis Nyǵmetýllınniń naqtylaýynsha, 2023 jyly bastalǵan teatrdy kúrdeli jóndeý jumysy merdigermen atqarylmaı, keıin sot sheshimimen toqtatylǵany belgili.
Onyń málimdeýinshe, sonymen birge ǵylymı-restavratsııalyq jumystardy odan ári jalǵastyrý úshin qarjy tapshylyǵyna baılanysty birqatar másele týyndady. Atap aıtqanda, qoldanystaǵy ǵylymı-jobalyq qujattamaǵa tıisti ózgerister engizý jáne oblystyq bıýdjette qarajat bólý múmkindigi paıda bolǵanǵa deıin óz qarajaty esebinen jumys jasaıtyn ınvestor tabý.
— Nátıjesinde ǵylymı-restavratsııalyq jumystar salasynda tájirıbesi bar «Kúmbez» JShS-men (Almaty) kelisim-shart jasalyp, ınvestordyń óz qarajaty esebinen jumystar 9 maýsymda bastaldy. Avtorlyq qadaǵalaý jumystaryn «INJSERVIS PLıÝS» JShS, tehnıkalyq qadaǵalaý jumystaryn «BK Montaj» JShS (ekeýi de Oraldan) júrgizedi. Jalpy joba quny — 2,2 mlrd teńge. Kúrdeli jóndeý jumystary ǵylymı-jobalyq qujattamaǵa saı júrgizilip jatyr. Jumystyń aıaqtalý merzimi — bıylǵy jeltoqsan aıy. Qarjy oblystyq bıýdjet naqtylanǵan kezde bólinedi, — dedi Jeńis Nyǵmetýllın.
Basqarma basshysynyń orynbasary departament usynysyna sáıkes smetanyń qaıta qaralǵanyn jetkizdi.
Eske sala keteıik, budan buryn BQO aýyldarynda jańadan tórt mádenıet úıi salynyp jatqanyn jazǵan bolatynbyz.