Taıaý Shyǵystaǵy qaqtyǵys: Iran aýmaǵynan 109 otandasymyz elge oraldy
ASTANA. KAZINFORM — Taıaý Shyǵystaǵy qarqyndy shıelenisken jaǵdaıda Qazaqstan Respýblıkasy óz azamattaryn Iran Islam Respýblıkasynyń aýmaǵynan evakýatsııalaýdy jedel uıymdastyrdy, dep habarlaıdy Syrtqy ister mınıstrligi.
— Úılesimdi jumys pen vedomstvoaralyq ózara is-qımyldyń joǵary deńgeıiniń arqasynda Qazaqstannyń Syrtqy ister mınıstrligi, quzyretti memlekettik organdary men sheteldegi dıplomatııalyq ókildikteri 109 otandasymyzdy elge qaıtardy. Evakýatsııa óńirdiń dostas memleketteriniń aýmaqtary arqyly tranzıtpen júzege asyryldy, atap aıtqanda 89 adam Irannan Túrikmenstan arqyly jáne 20 adam Ázerbaıjan arqyly ótti. Barlyq azamatqa konsýldyq-quqyqtyq kómek kórsetildi jáne Otanǵa oralý úshin qajetti jaǵdaı jasaldy, — delingen mınıstrlik habarlamasynda.
Syrtqy ister mınıstrligi Iran, Túrikmenstan jáne Ázerbaıjan bıligine qazaqstandyqtardyń búkil baǵyty boıynsha qaýipsiz jáne ýaqtyly ótýin qamtamasyz etýde mańyzdy ról atqarǵan kómek pen nátıjeli ózara is-qımyl kórsetkeni úshin rızashylyǵyn bildiredi.
Evakýatsııalyq is-sharalardy daıyndaý jáne ótkizý barysynda qazaqstandyq dıplomattar táýlik boıy jergilikti bılikpen is-qımyldy úılestirip, marshrýttardyń logıstıkasyn qamtamasyz etti, sondaı-aq quzyretti organdarmen ózara is-qımyl jasady jáne otandastarymyzǵa qajetti qoldaý kórsetti.
— Qysqa merzimde 200-den astam azamatymyz habarlasyp, olarǵa kómek kórsetildi. Irandaǵy barlyq qazaqstandyqtarmen úzdiksiz baılanys ornatylyp, olardyń aldyn ala kelisilgen tranzıttik baǵyttary boıynsha júrip-turýy uıymdastyryldy. Otandastarymyzdy elge qaıtarý boıynsha jumys jalǵasyp jatyr. Qazirgi ýaqytta QR SІM basqa quzyretti vedomstvolarmen birlesip Qazaqstan azamattaryn Izraıl Memleketinen evakýatsııalaýdy pysyqtaýda. Sheteldegi qazaqstandyqtardyń quqyqtary, qaýipsizdigi men amandyǵy — elimizdiń syrtqy saıası baǵytynyń asa mańyzdy basymdyǵy, — dep atap ótti vedomstvo.
Budan buryn Ázerbaıjan shekarasy arqyly Irannan 6 qazaqstandyq evakýatsııalanǵany anyqtaldy.