Taıaý Shyǵystaǵy qaqtyǵys: Dýbaıda jaǵdaı turaqty
ASTANA. KAZINFORM – Taıaý Shyǵysta áýe qatynasy ýaqytsha toqtatady. 28 aqpan kúni Izraıl men AQSh-tyń Iran aýmaǵyna jasaǵan soqqysynan keıin qarsy shabýyldar bastaldy. Sonyń saldarynan Dýbaı halyqaralyq áýejaıy men birqatar nysan zardap shekti. Búgingi kúni óńirdegi jaǵdaı salystyrmaly túrde turaqtaldy.
Bul týraly Dýbaı qalasynan tikeleı baılanysqa shyqqan travel-bloger Ǵabıt Qamataı Jibek Joly arnasyndaǵy «Búgin live» baǵdarlamasyna bergen suhbatynda málimdedi.
- Qazirgi ýaqytta Dýbaı qalasynda jaǵdaı turaqty. Áleýmettik jelide taraǵan aqparattar men beınejazbalar 28-shi aqpan kúngi oqıǵalar. Al 1-shi naýryzdan bastap jaǵdaı birtindep qalypqa kelip, 2-shi naýryzǵa qaraǵan tún tynysh ótti. Jalpy ahýal jaqsaryp keledi. Qazirgi tańda alańdaýǵa negiz joq. Aldaǵy kúnderi áýe qatynasy tolyq retteledi degen úmit bar. Aldyn ala málimetke sáıkes, reıster erteńnen bastap kezeń-kezeńimen ashyla bastaıdy. Áýe joldary qalpyna keltirilgen soń elge oralamyz, - dedi Ǵabıt Qamataı.
Otandasymyzdyń aıtýynsha, qazirgi ýaqytta BAÁ-de tek baılanys turaqsyz. Birqatar áleýmettik jeli ýaqytsha jumys istemeı tur. Osyǵan baılanysty turǵyndar jaqyndarymen eldiń arnaıy qosymshalary arqyly habarlasyp jatqanyń málimdedi.
- Qala aýmaǵynda áleýmettik jelilerge ýaqytsha shekteý qoıylǵan. Atap aıtqanda, WhatsApp pen Telegram jelileri buǵattalǵan. Osyǵan baılanysty jergilikti jerden baılanysqa shyǵý úshin Botim jáne Comera qosymshalaryn paıdalaný usynylady. Týystarymen habarlasqysy kelgen azamattar atalǵan qosymshalardy júktep, hat jiberip, qońyraý shala alady, - dedi travel-bloger.
Osy tusta Ǵabıt Qamataı Dýbaıǵa saıahattap baryp, elge qaıta almaı qalǵan azamattarǵa elshilik tarapynan kómek kórsetilip jatqanyn da aıtty.
- Qazaqstan Elshiligi alǵashqy kúnnen bastap belsendi jumys júrgizýde. Arnaıy Telegram jáne WhatsApp toptary ashylyp, jedel aqparat taratylýda. Dýbaıda qalǵan qazaqstandyqtarǵa jan-jaqty qoldaý kórsetilip jatyr. Atap aıtqanda, medıtsınalyq kómek uıymdastyrý, qonaqúıge ornalastyrý jáne elge qaıtarý máseleleri baqylaýǵa alynǵan, - dedi ol.
Munan bólek, Jibek Joly arnasyndaǵy «Búgin live» baǵdarlamasyna resmı týragent ókili Nazgúl Turysbekova da suqbat berdi. Týragenttiń aıtýynsha, shetelde qalǵan týrısterge barlyq qajetti jaǵdaı jasalyp jatyr.
- Qazirgi tańda biz Dýbaı qalasyndamyz. Bastapqy jospar boıynsha 28-shi aqpan kúni Qazaqstanǵa ushýymyz kerek edi, alaıda reıster toqtatyldy. Sol kúni túngi 00:30 shamasynda qonaqúıdiń mańynan kishkene jarylys daýystary estildi. Sırena dabyly qosyldy, barlyǵymyz qonaqúıdiń birinshi qabatyna tústik. Qysqa ýaqyt ishinde jaǵdaıdy turaqtandy. Týragent arqyly ushqan týrıster úsh kúnge qonaq úı jáne tamaqpen qamtamasyz etildi. Qazir bastysy – elimizge aman-esen jetýimizdi tilep otyrmyz, - dedi Nazgúl Turysbekova.
Eske sala keteıik, Qazaqstannan BAÁ, Qatar, Saýd Arabııasyna barǵan 4 myńnan astam týrıst bar.