Taıaý Shyǵystaǵy qaqtyǵys Dýbaı týrızmine qalaı áser etti
ASTANA. KAZINFORM — Taıaý Shyǵys elderindegi týrızm salasynyń shyǵyny 56 mlrd dollarǵa deıin jetýi múmkin, dep habarlaıdy BBC.
Sońǵy jıyrma jylda Dýbaı álemdegi jetekshi týrıstik ortalyqtardyń birine aınaldy. Ótken jyly emıratqa shamamen 20 mıllıon sheteldik týrıst kelgen. Alaıda Taıaý Shyǵystaǵy qaqtyǵys bastalǵaly bul qarqyndy ósim kúrt baıaýlady.
Qaqtyǵys bastalǵaly beri BAÁ-de myńdaǵan turaqty áýe reısteri toqtatylyp, óńirdegi eń júktemesi joǵary kólik toraptarynyń biri — Dýbaı halyqaralyq áýejaıynyń jumysyna áser etti. Ótken jyly bul áýejaı 95,2 mıllıon jolaýshyǵa qyzmet kórsetken.
Qazirgi tańda keıbir reıster qaıta jandanyp jatyr: Emirates ulttyq áýe tasymaldaýshysy qysqartylǵan kestemen ushýlardy oryndap, baǵyttar jelisin tolyq qalpyna keltirýge kúsh salyp jatyr.
Alaıda týrıster aǵynynyń azaıýyna baılanysty qonaqúılerdegi bron sany kúrt tómendedi.
Wego týrıstik kompanııasynyń kommertsııalyq dırektory Mamýn Hmıdenniń aıtýynsha, qaqtyǵys bastalǵannan keıin birneshe apta ishinde Dýbaı qonaqúıleriniń tolý deńgeıi ádettegi kórsetkishtiń nebári 15–20%-yna deıin túsken.
Osyǵan jaýap retinde qonaqúıler, ásirese Ramazan aıynyń aıaqtalýyna oraı, jergilikti turǵyndardy tartý úshin úlken jeńildikter usyndy. Palm-Djýmeıra aýdanyndaǵy keıbir lıýks qonaqúıler baǵalaryn eki esege deıin tómendetken.
— Qazirgi belgisizdik barlyǵyna áser etip otyr. Eger soǵys jaqyn arada aıaqtalsa, qalpyna kelý jyldam bolýy múmkin. Al eger uzaqqa sozylsa, jazǵy maýsymdy tolyq qaıta qaraýǵa týra keledi, — dedi Hmıden.
Keıbir qonaqúı jelileri josparly jóndeý jumystaryn alǵa tartyp, nysandarynyń bir bóligin ýaqytsha japqan. Ádette mundaı tájirıbe tynysh jaz aılarynda qoldanylatyn.
226 myńnan astam bron joıyldy
Qysym iskerlik qonaqúılerge de áser etti. Dýbaı — iri konferentsııalar men is-sharalar ortalyǵy bolǵandyqtan, uıymdastyrýshylar kóptegen jıyndy keıinge qaldyryp nemese múlde toqtatyp jatyr. Majestic Hotels kompanııasy úsh qonaqúıdegi shamamen 450 nómirdiń tolýy rekordtyq tómen deńgeıge túskenin habarlady.
Kompanııa ókili Varýn Radjdyń aıtýynsha, sáýirden keıingi kezeńge josparlanǵan saparlar jappaı toqtatylyp jatyr, al kóptegen is-sharalar keıinge shegerilgen.
AirDNA analıtıkalyq kompanııasynyń málimetinshe, 28 aqpan men 29 naýryz aralyǵynda, ıaǵnı qaqtyǵystyń alǵashqy aıynda, BAÁ boıynsha 226 500-den astam qysqa merzimdi bron joıylǵan.
Týrızmniń quldyraýy Dýbaıdaǵy qonaqjaılyq salasynda jumys isteıtin eńbek mıgranttaryna da áser etti. Suranys tómendegen saıyn kóptegen qyzmetkerdiń jumys ýaqyty qysqartylyp nemese olar aqysyz demalysqa jiberilgen.
Sarapshylardyń baǵalaýynsha, bıyl Taıaý Shyǵys elderi 23–38 mıllıon týrısten qaǵylýy múmkin. Al týrızmnen túsetin tabys 34–56 mlrd dollar aralyǵynda azaıýy yqtımal.
Osy aptada Dýbaı bıligi týrızmdi qosa alǵanda, bıznesti qoldaý úshin aldaǵy 3–6 aıǵa 272,26 mln dollar bóletinin málimdedi. Sonymen qatar qonaqúılerge týrıstik salyqty ýaqytsha keıinge qaldyrýǵa ruqsat berildi.
Buǵan deıin Dýbaıda qulaǵan synyqtar saldarynan segiz adam jaraqat alǵany habarlanǵan edi. Sondaı-aq Air Astana áýe kompanııasy Dýbaıǵa reısterdi toqtatýdy sáýir aıynyń sońyna deıin uzartqan.
