Taıaý Shyǵystaǵy qaqtyǵys: Ulybrıtanııada turǵyn úı baǵasy arzandady
ASTANA. KAZINFORM – Taıaý Shyǵystaǵy qaqtyǵys aıasynda Ulybrıtanııanyń jyljymaıtyn múlik naryǵy tómendedi, dep habarlaıdy Kazinform agenttiginiń Londondaǵy menshikti tilshisi.
Halifax bankiniń derekterine sáıkes, naýryz aıynda turǵyn úı baǵasy aqpanmen salystyrǵanda 0,5%-ǵa arzandap, ortasha úı quny qaıtadan 300 myń fýnt sterlıngten tómen túsip, 299 677 fýntty qurady.
Baǵanyń jyldyq ósim qarqyny da baıaýlady: 2026 jylǵy naýryzda jyljymaıtyn múlik ótken jyldyń sáıkes kezeńimen salystyrǵanda 0,8%-ǵa ǵana qymbattaǵan. Al aqpanda bul kórsetkish 1,2% bolǵan.
Halifax bankiniń ıpotekalyq baǵyt jónindegi basshysy Amanda Braıdenniń aıtýynsha, turǵyn úı naryǵyndaǵy sońǵy baıaýlaý Taıaý Shyǵystaǵy qaqtyǵysqa baılanysty joǵary belgisizdikti kórsetedi.
«Energııa tasymaldaýshylar baǵasynyń ósýine qatysty alańdaýshylyq ınflıatsııalyq kútýlerdi kúsheıtip, óz kezeginde ıpotekalyq mólsherlemelerdiń ósýine ákeldi. Bul bıyl paıyzdyq mólsherlemeler tómendeıdi degen senimdi álsiretip, jyl basynda baıqalǵan naryqtyń bastapqy serpinin tejedi», – dedi.
Sarapshylardyń pikirinshe, ıpotekalyq mólsherlemeler brıtandyq satyp alýshylar úshin, ásirese alǵash ret baspana alatyndar úshin negizgi faktor bolyp otyr. Olar bastapqy jarna jınaýmen qatar, qaryz qunyn da eskerýge májbúr.
Anglııa banki bıyl paıyzdyq mólsherlemeni birneshe ret kóterýi múmkin degen boljamdar tirkelgen mólsherlemesi bar ıpotekalyq nesıelerdiń qymbattaýyna sebep boldy. Alaıda sársenbi kúni tańerteń London qarjy ortalyǵynyń treıderleri AQSh pen Iran eki aptalyq shartty bitimge kelgennen keıin boljamdaryn tómendetti, dep jazady The Guardian.
Halifax sarapshylarynyń baǵalaýynsha, turǵyn úı baǵasynyń aldaǵy dınamıkasy qysym faktorlarynyń qansha ýaqytqa sozylatynyna, sondaı-aq olardyń ekonomıka men jumyssyzdyq deńgeıine áserine baılanysty bolady.
Sońǵy aptalarda Taıaý Shyǵystaǵy jaǵdaıǵa baılanysty ıpotekalyq usynystar sany qysqardy. Naýryz aıynyń sońyna qaraı eki jyldyq tirkelgen ıpotekanyń ortasha mólsherlemesi 5,84%-ǵa deıin ósip, 2024 jylǵy shildeden bergi eń joǵary deńgeıge jetti.
Degenmen, Ulybrıtanııadaǵy ıpotekalyq mólsherlemelerdiń ósýi 2022 jyly baıqalǵan kúrt sekiriske qaraǵanda birshama qalypty deńgeıde qalyp otyr. Sonymen qatar, kóptegen úı sharýashylyqtary buryn bekitilgen ıpotekalyq kelisimderge ıe bolǵandyqtan, qazirgi mólsherleme ósiminen ishinara qorǵalǵan.
Osy faktorlardy eskersek, sarapshylar qysqa merzimdi kezeńde belgisizdik naryq belsendiligin tejegenimen, turǵyn úı baǵasy salystyrmaly túrde turaqty saqtalýy múmkin ekenin aıtady.
Buǵan deıin munaı baǵasy kúrt tómendep, qor naryqtary AQSh pen Iran Ormýz buǵazyndaǵy negizgi sý jolyn qaıta ashýdy qamtıtyn eki aptalyq bitimge kelgennen keıin ósim kórsetkeni habarlanǵan edi.
