Taıaý Shyǵystaǵy qaqtyǵys álemge áıgili brendterge áser etti
Izraıl men HAMAS arasyndaǵy qaqtyǵystardyń shıelenisýi saldarynan kóptegen amerıkalyq korporatsııalar jarııa málimdeme jasaýdan tartynyp, únsiz qaldy. Olardyń qatarynda Taıaý Shyǵysta jumys isteıtin fast-fýd meıramhanalary men kofehanalar da bar, dep habarlaıdy Kazinform agenttigi Nation's Restaurant News saıtyna silteme jasap.
Izraılge jasalǵan shabýyldardan keıin jaq ashqan sanaýly qoǵamdyq tamaqtaný oryndarynyń biri Starbucks boldy. Ol ótken sársenbide «Izraıl men Gaza sektoryndaǵy jazyqsyz adamdarǵa qarsy zorlyq-zombylyq pen óshpendilik kúsheıgen jan túrshigerlik lańkestik aktilerge janashyrlyq tanytqan» málimdeme jasady.
Sol kúni birneshe aqparat agenttigi Starbucks kásipodaǵy Starbucks Workers United X áleýmettik jelisinde Gaza sektoryndaǵy qorshaýdy buzyp jatqan HAMAS basqaratyn býldozerdiń sýretimen birge «Palestınamen tilektespiz» degen sýret jarııalady dep habarlady. Keıinnen bul jazba joıylyp, Starbucks tarapynan synǵa ushyrady, ol áleýmettik jelide óz kásipodaqtarynyń ustanymyna qarsy pikir qaldyrdy.
Nátıjesinde Starbucks pen kásipodaq sársenbide áleýmettik jelidegi jazbaǵa baılanysty bir-birin sotqa berdi. Sot qujattarynda kompanııa odaq akkaýntynda jarııalanǵan Palestınany qoldaıtyn jazba júzdegen tutynýshylardy ashýlandyryp, onyń bedeline nuqsan keltirdi dep málimdeıdi.
Workers United kompanııasy Pensılvanııadaǵy federaldy sottan kompanııa Starbucks ataýyn jáne uqsas logotıpti paıdalanýdy jalǵastyra alady degen sheshim shyǵarýdy surady, dep habarlaıdy AP News.
Juma kúni McDonald's Israel ızraıldik sarbazdarǵa kúnine 4000 túski as jetkizetinin jáne olarǵa 50% jeńildik usynatynyn habarlady.
Bul málimdemege tutynýshylar birden jaýap qaıtardy. X áleýmettik jelisinde kóptegen qoldanýshylar boıkot jarııalaýǵa shaqyryp, «McDonalds TsAHAL-dy (Izraıl áskerı kúshterin) tegin tamaqpen qamtamasyz etýde. Biz óz ustanymdarymyzǵa berik bolyp, senimderimizge sáıkes áreket etýimiz kerek. McDonald's-qa boıkot jarııalaıyq. Qaqtyǵystarǵa qoldaý kórsetken kompanııalardy qoldaý durys emes, ásirese ol jazyqsyz adamdardyń ólimine qatysty bolsa» dep jazdy.
Taıaý Shyǵystaǵy basqa da McDonald's franshızalary gazalyqtar men palestınalyqtardy qoldaıtyndaryn bildirdi, onyń ishinde Omandaǵy McDonald's, Kýveıttegi McDonald's, Mysyr, Saýd Arabııasy, Lıvan, Túrkııa jáne Pákistandy McDonald's bar. Bul kompanııalar McDonald's Israel-diń ızraıldik áskerılerge qoldaý kórsetýin aıyptaıtyn birdeı málimdeme jasady, sondaı-aq Palestınaǵa jáne Gaza sektoryndaǵy zardap shekkenderge qoldaý kórsetý úshin qarajat berdi.