Taıaý Shyǵystaǵy dıplomattar qaı jaǵdaıda Qazaqstanǵa qaıtarylady
ASTANA. KAZINFORM — Taıaý Shyǵys óńirinde elshilik qyzmetkerleri óz jumystaryn jalǵastyryp jatyr. Bul týraly QR Syrtqy ister mınıstri Ermek Kósherbaev málim etti.
— 10 myńnan astam (Taıaý Shyǵystan) adamdy shyǵardyq. Sol elderden óz erkimen ketkisi kelgenderdiń barlyǵyn Qazaqstanǵa qaıtardyq. Árıne, Birikke Arab Ámirlikterinde turyp jatqan azamattar bar jáne olar qalaı shyǵatynyn ózderi qaraıdy. Aldaǵy ýaqytta qandaı da bir qıyndyq bolsa, memleket kómektesedi, — dedi Ermek Kósherbaev Parlament Májilisinde tilshi suraǵyna jaýap bere otyryp.
Bul turǵyda mınıstr atalǵan elderden el azamattaryn qaıtarýǵa qomaqty qarajat jumsalýy múmkin ekenin eske saldy.
— Osy oraıda aıtarymyz, atalǵan óńirge sapardy josparlaý kezinde jaqsylap oılaný kerek. Sebebi belgili bir qıyndyqtar bolýy yqtımal, — dedi vedomstvo basshysy.
Onyń aıtýynsha, atalǵan óńirden konsýldyq qyzmetkerleriniń otbasy músheleri men balalary evakýatsııalanǵan. Dıplomattardyń ózderi sol jerde qalady.
— Elshilikterde tıisti qyzmetkerler ǵana qaldy. Ahýal kúrdelene tússe, olardy da shyǵaramyz. Qazir qyzmetkerler sol elderde jumysyn jalǵastyryp jatyr, — dedi Ermek Kósherbaev.
Aıta keteıik, bir apta buryn Taıaý Shyǵystan Qazaqstanǵa 9926 azamat evakýatsııalanǵanyn jazǵan edik.
