Taıaý Shyǵystaǵy ahýal: Týrızm mınıstrligi qazaqstandyq saıahatshylarǵa eskertý jasady

ASTANA. KAZINFORM – Týrızm jáne sport mınıstrligi Taıaý Shyǵystaǵy ahýalǵa baılanysty qazaqstandyq saıahatshylarǵa eskertý jasady. 

 – Qurmetti týrıster! Qazaqstan Respýblıkasy Kólik mınıstrligi Azamattyq avıatsııa komıtetiniń Taıaý Shyǵystaǵy jaǵdaıǵa baılanysty habarlamasyna sáıkes, Iran, Izraıl, Sırııa, Irak, Iordanııa jáne Lıvan aýmaǵynda, áýe keńistiginde jáne oǵan jaqyn aımaqtarda ushýǵa tolyq tyıym salynǵanyn habarlaımyz. Bul shekteý arnaıy buıryq shyqqanǵa deıin kúshinde bolady. Atalǵan vedomstvonyń nusqaýy otandyq áýe tasymaldaýshylardyń barlyq turaqty jáne turaqsyz jolaýshylar, júk, sondaı-aq tehnıkalyq reısterine qatysty, - delingen habarlamada. 

Osy jaǵdaıǵa baılanysty mıntsrlik týrısterden jaǵdaıdy jiti qadaǵalap, saparlaryn, ásirese BAÁ men Parsy shyǵanaǵy elderine barýdy muqııat josparlaýdy surap otyr. 

– Atalǵan óńirdegi ahýal ózgergen jaǵdaıda, Qazaqstannyń Avıatsııalyq ákimshiliginiń avıatsııalyq qaýipsizdik departamenti qosymsha aqparat usynady. QR Týrızm jáne sport mınıstrligi jaǵdaıdy jiti baqylaýda ustap, jaýapty memlekettik organdar, elshilikter jáne týroperatorlarmen turaqty baılanysyp otyr. Qajet bolǵan jaǵdaıda Mınıstrlik Týrıstik Qamqormen jáne áýekompanııalarmen birlesip týrısterdi qaıtarýdy qamtamasyz etedi, - dedi mınıstrlik ókilderi. 

Eske salaıyq, Ázerbaıjan shekarasy arqyly Irannan 6 qazaqstandyq evakýatsııalanǵan bolatyn. 

Sondaı-aq buǵan deıin Qazaqstannyń Taıaý Shyǵys elderine áýe keńistigin japqany anyqtaldy.