Taıaý Shyǵystaǵy ahýal: Otandyq áýe kompanııalar reısterdi toqtatýǵa májbúr boldy
ASTANA. KAZINFORM — Kólik mınıstrligi Taıaý Shyǵystaǵy jaǵdaıdyń shıelenisýine sáıkes qazaqstandyq áýe kompanııalarynyń reısterdi ýaqytsha toqtatýy týraly jańartylǵan aqparat taratty.
Mınıstrlik málimetinshe, 2025 jylǵy 24 maýsym kúngi jaǵdaı boıynsha Taıaý Shyǵystaǵy áskerı-saıası ahýaldyń kúrt shıelenisýine baılanysty birqatar elde resmı túrde shekteýler engizilip, azamattyq avıatsııaǵa arnalǵan áýe keńistikteri jabyldy.
— Májbúrli sharalar qarýdy qoldaný qaýpi, navıgatsııalyq júıelerdiń durys jumys istemeýi, áýe qorǵanysy júıeleriniń belsendiligi jáne azamattyq áýe kemeleriniń ushýy úshin joǵary táýekelderge baılanysty qabyldandy, — delingen habarlamada.
Sońǵy málimetke sáıkes, shekteýler kelesi elderde qoldanylady:
- Izraıl áýe keńistigi tolyq jabyq;
- Iran áýe keńistigi tolyq jabyq (onyń ishinde Parsy jáne Oman shyǵanaqtary);
- Irak, Iordanııa, Lıvan — zymyran men dron shabýyl qaýpine sáıkes ushýlardy ýaqytsha shekteý;
- Kýveıt, Bahreın, BAÁ — reısterdi shekteý jáne toqtatý, ishinara qaqtyǵys aımaǵyna jaqyn marshrýttardy buǵattaý.
Іri halyqaralyq áýetasymaldaýshylar da reısterdi ýaqytsha toqtatty. Olardyń qatarynda Air France-KLM, United, American Airlines, Japan Airlines, Air Canada Dýbaı, Doha jáne Er-Rııadqa ushýdy toqtatty. Qatar Airways ushý kestesin retteıdi. Etihad resmı eskertý jasady. Emirates qaqtyǵys aımaǵyn aınalyp, ushýdy jalǵastyryp jatyr. Vedomstvo atap ótkendeı, osyǵan baılanysty qazaqstandyq áýe kompanııalary qaýipsizdikti qamtamasyz etý maqsatynda Dýbaı men Doha qalalaryna birqatar reısti ýaqytsha toqtatty. Demek, elimizden shetelge shyqpaqshy adam sany — 683 bolsa, shetelden elge oralatyn adam sany — 1051 adam. Jalpy alǵanda bul jaǵdaı 1 734 jolaýshyǵa áser etti.
— Qazaqstandyq áýe kompanııalardyń Parsy shyǵanaǵy elderine ushýǵa baǵyttalǵan reısterdi toqtata turýy aımaqtaǵy áskerı-saıası jaǵdaıdyń kúrt shıelenisýine negizdelgen májbúrli shara. Áýe kompanııalary qabyldaǵan sheshim halyqaralyq tájirıbege sáıkes qabyldandy. Basty maqsat — jolaýshylar men ekıpaj músheleriniń qaýipsizdigin qamtamasyz etý. Qoldanystaǵy zańnamaǵa sáıkes jolaýshylar ystyq tamaqpen, qonaq úı jáne transfermen qamtamasyz etildi. Toqtatylǵan nemese keıinge shegerilgen reıster boıynsha jolaýshylar tegin qaıta bron qoıa alady nemese áýe bıletteriniń qunyn tolyq qaıtaryp ala alady. Kólik mınıstrligi avıakompanııalarmen birlesip jaǵdaıdy jiti baqylaýda, qajet bolǵan jaǵdaıda jedel sheshim qabyldap, kesteni qaıta qaraý jumysy júrgiziledi, — delingen mınıstrlik habarlamasynda.
Reıster jaqyn arada qaıta júzege asyrala bastaıdy dep kútilip otyr. Qosymsha aqparat alý úshin kelesi nómirlerge habarlasý qajet:
Air Astana
+7 727 244 4477
(24/7) +7 7172 584477
(24/7) +7 702 702 4477
(24/7) +7 7272 44 44 78
(24/7) WhatsApp: +7 702 702 00 74 (24/7)
Online chat: airastana.com
(24/7) SCAT +7 7252 99 88 80
+7 701 738 25 76
Qazaqstannyń avıatsııalyq ákimshiligi +7 (717-27) 9-82-15.
Buǵan deıin SІM Taıaý Shyǵystaǵy jaǵdaıǵa baılanysty konsýldyq kómekti kúsheıtkenin jazǵan edik.