Taıaý Shyǵystaǵy ahýal: munaı baǵasy keıingi bir aptadaǵy eń joǵary deńgeıge jetti
ASTANA. KAZINFORM — Juma, 25 qyrkúıekte álemdik munaı baǵasy AQSh pen Iran arasynda bitim jasalýy múmkin degen boljamǵa baılanysty ózgerip otyr. Sonymen qatar naryq qatysýshylary Taıaý Shyǵystan munaı jetkizilimi úzilip qalýy múmkin degen qaýipke alańdaýly, dep habarlaıdy Kazinform agenttigi Reuters-ke silteme jasap.
25 qyrkúıektegi málimet boıynsha, Brent markaly munaıdyń jeltoqsandaǵy fıýchersteri 0,4% arzandap, barreli 106,20 dollar boldy.
Amerıkalyq West Texas Intermediate (WTI) munaıynyń baǵasy 1,1% tómendep, barreli 93,59 dollarǵa jetti.
Munaı naryǵyndaǵy jaǵdaıǵa birden birneshe faktor áser etip otyr. Bir jaǵynan, ınvestorlar Vashıngton men Tegeran arasynda kelisim jasalý múmkindigin baǵalap jatyr. Eger taraptar kelisimge kelse, shıelenis báseńdep, Ormýz buǵazy arqyly munaı jetkizý qaıta qalpyna kelýi múmkin. Ekinshi jaǵynan, Saýd Arabııasynyń energetıkalyq nysandaryna shabýyl jasalýy yqtımal degen qaýip te saqtalyp otyr.
Osy apta qorytyndysy boıynsha Brent baǵasy ázirshe shamamen 2,2% ósken, al WTI shamamen 6,8% tómendedi. Eki negizgi munaı markasynyń baǵasy arasyndaǵy aıyrmashylyq mamyr aıynan bergi eń joǵary deńgeıge jetip, barreli shamamen 12,6 dollar boldy. Sarapshylar muny jahandyq munaı jetkizilimine qatysty geosaıası táýekelderdiń joǵary bolýymen jáne AQSh naryǵyndaǵy jaǵdaıdyń salystyrmaly túrde turaqty bolýymen baılanystyrady.
Bir kún buryn munaı baǵasy keıingi bir aptadaǵy eń joǵary deńgeıge kóterildi. Saýda barysynda Taıaý Shyǵystan munaı jetkizilimine qatysty alańdaýshylyqtyń kúsheıýine baılanysty Brent pen WTI markalarynyń baǵasy shamamen 5% ósti.
Buǵan deıin Saýd Arabııasy munaıdy Ormýz buǵazyn aınalyp ótip, Qyzyl teńiz jaǵalaýyndaǵy ıAnbý portyna jetkizetin East-West munaı qubyrynyń jumysyn qaıta bastady. Osy baǵyt arqyly munaı jetkizýdiń qaıta jandanýy buǵan deıin onyń baǵasynyń tómendeýine áser etken.
Eske salaıyq, osy aptada Brent markaly munaı Taıaý Shyǵystaǵy jaǵdaıǵa baılanysty barreline 105 dollardan tómendedi
