Taıaý Shyǵystaǵy ahýal Qazaqstandaǵy áýe bıletteriniń baǵasyna áser ete me
ASTANA. KAZINFORM — Ormýz buǵazy arqyly munaı jetkizý tizbegindegi irkilister aıasynda Eýropa men Azııanyń birqatar áýe kompanııasy avıaotyn baǵasynyń qymbattaýy men onyń tapshylyǵy qaýpine baılanysty reıster sanyn qysqarta bastady.
Kazinform tilshisi bul jaǵdaıdyń otandyq áýe tasymaldaýshylaryna qalaı áser etkenin anyqtady. Naqty jaýap alý úshin redaktsııa Energetıka jáne Kólik mınıstrlikterine saýal joldady.
Energetıka mınıstrliginiń málimetinshe, maýsym aıynyń basyndaǵy jaǵdaı boıynsha elimizdegi avıatsııalyq otyn qory shamamen 150 myń tonnany quraıdy.
— Qolda bar avıaotyn qory ishki naryqtyń 1–1,5 aılyq qajettiligin óteýge jetkilikti. Bul rette qazaqstandyq munaı óńdeý zaýyttary avıaotyn óndirýdi jáne qordy tolyqtyrýdy úzdiksiz jalǵastyryp otyr. Degenmen bul merzim suranys pen usynysqa baılanysty azdap ózgerýi múmkin. Mysaly, jazǵy týrıstik maýsymda suranys artady, — dep habarlady vedomstvo.
Sonymen qatar mınıstrlik Taıaý Shyǵystaǵy qazirgi jaǵdaıdyń qazaqstandyq munaı óńdeý zaýyttarynyń jumysyna jáne avıaotyn óndirisine áser etpeıtinin atap ótti.
Óz kezeginde Azamattyq avıatsııa komıteti de áýe kompanııalary otyndy qalypty rejımde alyp jatqanyn málimdedi.
— Qazirgi ýaqytta qazaqstandyq áýe kompanııalarynyń reısterine aıtarlyqtaı áser etýi múmkin alǵysharttar baıqalmaıdy. Іshki jáne halyqaralyq reıster qoldanystaǵy kestege sáıkes oryndalyp jatyr. Avıaotynmen qamtamasyz etýge baılanysty ushý baǵdarlamalaryn ózgertýge negiz joq, — delingen komıtet jaýabynda.
Komıtet álemdik energııa tasymaldaýshylar men munaı ónimderi naryǵyndaǵy jaǵdaıdy baqylaýdy jalǵastyryp otyr. Qajet bolǵan jaǵdaıda memlekettik organdar men naryq qatysýshylary azamattyq avıatsııanyń turaqty jumysyn qamtamasyz etý úshin qosymsha sharalar qabyldaıdy.
Azamattyq avıatsııa komıtetiniń málimetinshe, qazirgi ýaqytta áýe bıletteriniń baǵasyna aıtarlyqtaı yqpal etetin faktorlar baıqalmaı otyr.
— Áýe bıletteriniń quny áýe kompanııalardyń paıdalaný shyǵyndary, qyzmet kórsetý baǵasy, naryqtaǵy jaǵdaı jáne basqa da ekonomıkalyq kórsetkishter sekildi kóptegen faktorlardyń yqpalymen qalyptasady. Qazirgi ýaqytta ushýlardy oryndaý jáne salany avıaotynmen qamtamasyz etý qalypty rejımde júrgizilip jatyr, — dep túıindedi vedomstvo.
Eske salaıyq, Taıaý Shyǵystaǵy qaqtyǵystyń ýshyǵýy saldarynan Ormýz buǵazynyń jumysynda irkilister týyndap, álemdegi teńiz arqyly jetkiziletin avıaotynnyń shamamen 21%-yna áser etti.
Reuters agenttiginiń málimetinshe, Ormýz buǵazy arqyly keme qatynasyna tóngen qaýipke baılanysty Azııa-Tynyq muhıty óńirinen táýligine keminde 400 myń barrel avıaotyn jetkizý táýekel aımaǵynda tur.
Ryanair loýkosteri jazǵy kezeńde otyn qorynyń 10–20%-yn joǵaltý tasymaldaýshylardy reısterdi toqtatýǵa jáne tasymaldaý kólemin qysqartýǵa májbúr etýi múmkin ekenin eskertken bolatyn.
Buǵan deıin Taıaý Shyǵystaǵy jaǵdaıǵa baılanysty týyndaǵan energetıkalyq daǵdarys aıasynda Lufthansa áýe kompanııasy 2026 jyldyń maýsym-qazan aılary aralyǵynda shamamen 20 myń reısti toqtatýdy josparlap otyrǵany habarlanǵan edi.
