Taıaý Shyǵystaǵy ahýal: FlyArystan jolaýshylaryna mańyzdy habarlama jasady
ASTANA. KAZINFORM — FlyArystan áýekompanııasy Aqtaý — Dýbaı — Aqtaý baǵyty boıynsha reısterin Taıaý Shyǵystaǵy turaqsyz jaǵdaı men óńirdegi shekteýlerge baılanysty ýaqytsha toqtatty. Áýe kompanııa jolaýshylardy qaýipsiz qaıtarý úshin sharalar qoldanyp, bıletti qaıtarý nemese qaıta brondaý múmkindigin usynyp otyr.
Kompanııa qazaqstandyqtardy elge qaıtarý úshin bar kúshin salyp jatqanyn málim etti.
— Qazir FlyArystan áýekompanııasynyń Aqtaý — Dýbaı — Aqtaý baǵyty boıynsha reısteriniń oryndalýy Taıaý Shyǵystaǵy turaqsyz jaǵdaıǵa jáne óńirdegi aǵymdaǵy shekteýlerge baılanysty ýaqytsha toqtatyldy. Bul jaıt jolaýshylar úshin eleýli qolaısyzdyqtar men belgisizdik týǵyzatynyn túsinemiz jáne jolaýshylardy Qazaqstanǵa qaıtarý úshin bar kúshimizdi jumyldyrýdamyz, — delingen habarlamada.
Qoldanystaǵy halyqaralyq áýe tasymaly qaǵıdalaryna sáıkes, fors-major jaǵdaıynda tasymaldaýshynyń mindettemeleri bılet qunyn qaıtarýmen nemese múmkindik bolǵan jaǵdaıda balamaly tasymaldaýdy usynýmen shekteledi. Oǵan qaramastan, FlyArystan jolaýshylaryna ári qaraıǵy áreketterdi úılestirýge ýaqyt berý maqsatynda jolaýshylardy áýekompanııa esebinen bir táýlikke turý ornymen qamtamasyz etti. Sondaı-aq, áýe kompanııanyń jergilikti ókilderi jolaýshylarmen baılanysta bolyp, aqparattyq qoldaý kórsetýde jáne uıymdastyrýshylyq máselelerdi úılestirýge járdemdesip keledi.
— Qazir FlyArystan Birikken Arab Ámirlikteriniń quzyretti organdarynan reısti oryndaýǵa ruqsat kútýde jáne Qazaqstan Respýblıkasynyń avıatsııalyq bılik organdarymen turaqty baılanysta. Paralleldi rette áýekompanııa óńirdegi avıatsııalyq qaýipsizdik táýekelderin derbes baǵalaý jumystaryn júrgizip jatyr. Barlyq qajetti rásim kelisilip, táýekelderdi baǵalaý aıaqtalǵannan keıin jolaýshylardy qaıtarýdyń kúni, ýaqyty jáne qaýipsiz formaty týraly sheshim qabyldanady. Tıisti sheshimder qabyldanǵan boıda, áýekompanııa brondaý kezinde kórsetilgen baılanys derekteri boıynsha jolaýshylarmen jedel habarlasyp, tolyq nusqaýlyq jiberedi. Bul rette, qaıtarý reısine otyrǵyzýda mindetti shart — FlyArystan áýekompanııasynyń Dýbaı — Aqtaý reısine paıdalanylmaǵan áýe bıletiniń bolýy. Sonymen qatar, 28 aqpan, 7 naýryz jáne 10 naýryz kúngi reısterdiń jolaýshylaryna bılettiń tolyq qunyn qaıtarý nemese satyp alynǵan arna boıynsha tegin qaıta brondaý múmkindigi qoljetimdi, — delingen áýe kompanııa taratqan habarlamada.
Jolaýshylardan dıplomattar men memlekettik organdardyń habarlamalaryn qadaǵalap, baılanysta bolyp, brondaý kezinde kórsetilgen baılanys derekteriniń (telefon nómiri men elektrondyq poshta) ózekti jáne habarlamalar alýǵa qoljetimdi bolýyn qamtamasyz etý suralady. Áýe kompanııa barlyq jolaýshyny múmkindiginshe tez ári qaýipsiz qaıtarý úshin jaǵdaıdy táýlik boıy baqylaýdy jalǵastyrady.
Budan buryn Saýd Arabııasynan 343 otandasymyz elge jetkiziletinin jazǵan edik.
