Taıaý Shyǵystaǵy ahýal: Energetıka mınıstrligi munaı nysandarynyń qorǵalýyna túsinik berdi
ASTANA. KAZINFORM — Energetıka vıtse-mınıstri Sanjar Jarkeshov el aýmaǵynda AQSh ınvestıtsııasymen qurylǵan munaı nysandaryn Iran shabýylynan qorǵaý múmkindigine qatysty pikir aıtty.
— Jalpy, nysandardaǵy jumys qalypty tártipte júrip jatyr. Atap aıtqanda, júıeniń jumysyna kedergi jasalyp jatqan joq. Árıne, osy konsortsıýmnyń barlyq múshesimen ártúrli stsenarıı pysyqtalyp jatyr. Bul óz kezeginde iri joba ekeni túsinikti. Qazaqstan jaǵynan barlyq mindetteme oryndalyp keledi. Sonymen qatar, tranzıtke qatysyp jatqan taraptar jáne energııa resýrstaryn qabyldaıtyn elder de óz áreketterin jasap otyr. Sondyqtan barlyǵy osy qubyrdyń eshbir toqtaýsyz jumys isteýine múddeli, — dedi Sanjar Jarkeshov Senatta tilshiler suraǵyna jaýap bere otyryp.
Vıtse-mınıstr el aýmaǵyndaǵy nysandardyń áskerı qorǵalýy boıynsha iske asyrylyp jatqan sharalar qupııa ekenin, ıaǵnı jarııalaýǵa jatpaıtynyn atap ótti.
Eske salsaq, byltyr qarasha aıynda Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy.
Bıyl aqpan aıynda AQSh prezıdentiniń ákimshiligi Kaspıı qubyr konsortsıýmynyń munaı ınfraqurylymyna jasalǵan soqqylardan keıin Ýkraınaǵa dıplomatııalyq eskertý joldady. Bul shabýyldar Qazaqstan munaıyn eksporttaýǵa qatysty amerıkalyq ekonomıkalyq múddelerge áser etti.
