Taıaý Shyǵystaǵy ahýal: Azııa áýe kompanııalary reısterin qysqartyp jatyr
ASTANA. KAZINFORM – Azııadaǵy áýe kompanııalary reıster sanyn qysqartyp, bazalyq áýejaılardan qosymsha avıaotyn alyp shyǵýǵa jáne janarmaı quıý úshin aralyq aıaldamalar sanyn kóbeıtýge májbúr bolyp otyr. Bul týraly Reuters jazdy.
Buǵan Taıaý Shyǵystaǵy qaqtyǵys saldarynan keıbir elderde avıatsııalyq otyn jetkiziliminiń qysqarýy sebep bolyp, onsyz da janarmaı baǵasynyń kúrt ósýinen zardap shekken salaǵa qosymsha qysym túsirip otyr.
Kpler kompanııasynyń deregine súıensek, Irannyń Ormýz buǵazyn jabýy saldarynan teńiz arqyly jetkiziletin álemdik avıatsııalyq otyn kóleminiń shamamen 21 paıyzy qysqarǵannan keıin, eýropalyq áýe tasymaldaýshylary da osyndaı irkilisterge daıyndala bastady.
Buǵan deıingi munaı daǵdarystary negizinen baǵanyń ósýine alyp kelse, qazirgi jaǵdaı naqty jetkizilim kólemin de shektep otyr. Sonyń saldarynan úkimetter, áýe kompanııalary men áýejaılar otyn berýdi normalaý múmkindigin qarastyryp jatyr.
– Áýe kompanııalary ókilderimen sóıleskenimde, olardyń bolashaqqa qatty alańdap otyrǵanyn baıqadym. Sebebi soǵystyń qashan aıaqtalatynyn da, Parsy shyǵanaǵy óńirinen shıkizat jetkizilimi qashan qaıta jandanatynyn da eshkim bilmeıdi, – dedi avıatsııalyq konsaltıngtik Endau Analytics kompanııasynyń negizin qalaýshy Shýkor ıÝsof.
Sarapshylardyń pikirinshe, bul jaǵdaıdan eń osal aımaqtar – Azııa, Eýropa jáne Afrıka. Al AQSh-tyń ishki qory jetkilikti bolǵandyqtan, onyń jaǵdaıy salystyrmaly túrde turaqty.
Azııada qazirgi tańda eń kúrdeli jaǵdaı tabys deńgeıi tómen ári ımportqa táýeldi naryqtarda baıqalyp otyr. Olardyń qatarynda Vetnam, Mıanma jáne Pákistan bar. Buǵan Qytaı men Taılandtyń avıatsııalyq otyn eksportyn ýaqytsha toqtatýy, al Ońtústik Koreıanyń eksport kólemin ótken jyldyń deńgeıinde shekteýi áser etken.
Malaızııanyń bıýdjettik AirAsia X áýe kompanııasy qazirgi ýaqytta Vetnam áýejaılaryna ushar aldynda Malaızııadan qosymsha otyn tıep shyǵýǵa májbúr bolyp otyr. Bul týraly dúısenbi kúni jýrnalısterge kompanııanyń bas dırektory Bo Lıngam málimdedi.
– Olar bizge múlde otyn bermeı jatyr deýge bolmaıdy, biraq kólemin shektep otyr, – dedi ol Vetnamǵa qatysty.
Aıta keteıik, buǵan deıin Eýropalyq avıatsııalyq retteýshi organ avıakompanııalardy Irannyń ústinen ushpaýǵa shaqyrdy.
