Taıaý Shyǵystaǵy ahýal Almaty áýejaıy jumysyna qalaı áser etti
ALMATY. KAZINFORM — Taıaý Shyǵystaǵy jaǵdaıdyń ýshyqqanyna qaramastan, Almaty halyqaralyq áýejaıy qalypty rejımde jumys istep tur. Kazinform agenttiginiń tilshisi termınaldaǵy qazirgi ahýaldy bilip qaıtty.
Halyqaralyq termınalda jolaýshylar qarasy qalyń bolǵanymen, abyr-sabyr baıqalmaıdy.
Jolaýshylar reısterin sabyrmen kútip, tirkeýden qalypty tártippen ótip jatyr. Ushyp shyǵatyn baǵyttar kestege saı oryndalyp jatyr, ázirshe keshikken reıster joq.
Ózgerister negizinen ushyp keletin reısterge áser etti. Dýbaı, Doha, Shardja jáne Kýveıtten keletin reıster toqtatylǵan. Jıddadan ushatyn reıs shamamen tórt saǵatqa keshigip jatyr, al Delıden keletin ushaq 14 saǵattan soń bir-aq jetedi.
Basqa baǵyttar boıynsha áýejaı qalypty jumys rejımin jalǵastyryp otyr.
Aıta keteıik, buǵan deıin Qazaqstan Taıaý Shyǵystaǵy ahýaldyń ýshyǵýyna baılanysty Iran, Izraıl, Sırııa, Irak, Iordanııa jáne Lıvan áýe keńistigi arqyly jáne oǵan jaqyn aýmaqta ushýǵa tolyq tyıym engizgen bolatyn.
Eske salaıyq, búgin tańerteń Izraıl men AQSh Iran aýmaǵyndaǵy nysandarǵa áýe soqqylaryn jasaı bastaǵany týraly aqparat tarady.
Buǵan jaýap retinde Tegeran Izraıl aýmaǵyna jáne birqatar kórshiles arab elderine zymyranmen shabýyldar jasaǵanyn málimdedi.
QR Syrtqy ister mınıstrligi Iran aýmaǵynda zardap shekkenderdiń arasynda Qazaqstan azamattary joq ekenin resmı túrde habarlady.
Sonymen qatar vedomstvo jaǵdaıdyń ýshyǵýyna baılanysty sheteldegi qazaqstandyq dıplomatııalyq ókildikterdiń shuǵyl baılanys nómirleri men «jedel jeli» telefondaryn jarııalady.
Qazaqstannan Taıaý Shyǵys elderine ushatyn barlyq reıs 3 naýryzǵa deıin ýaqytsha toqtatyldy.
Buǵan qosa, Dýbaı halyqaralyq áýejaıy (DXB) men Ál-Maktým halyqaralyq áýejaıy (DWC) jumysy da Taıaý Shyǵystaǵy ahýalǵa baılanysty ýaqytsha toqtatylǵany habarlandy.
