Taıaý Shyǵystaǵy ahýal: Air Astana 735 jolaýshyny qonaqúıge ornalastyrdy

ASTANA. KAZINFORM — Reısterdiń Taıaý Shyǵys baǵyttaryna májbúrli túrde ýaqytsha toqtatylýyna baılanysty Air Astana kompanııalar toby óńirde qalyp qoıǵan jolaýshylardy qoldaý maqsatynda birqatar sharalardy júzege asyrdy. Bul týraly áýe kompanııanyń baspasóz qyzmeti málim etti.

Qazirgi ýaqytta áýe kompanııanyń esebinen tómendegi jolaýshylar sany qonaqúılerge ýaqytsha ornalastyryldy:

• Doha — 174 jolaýshy;
• Delı — 231 jolaýshy (Almaty — Dýbaı reısi);
• Dýbaı — 330 jolaýshy.

Fors-major jaǵdaıyna qaramastan, jolaýshylarǵa bir táýlik tegin turý múmkindigi oılastyryldy.

— Áýekompanııa Dýbaı qalasyndaǵy Flora Al Barsha jáne Flora Creek qonaqúılerimen tegin turý merzimi aıaqtalǵannan keıin Air Astana jolaýshylary úshin arnaıy tarıfter usyný jóninde kelisimge keldi, — delingen habarlamada.

Áriqaraı qonaqúıde turý máselesi týyndaǵan jaǵdaıda, sondaı-aq quqylyq jáne repatorıatsııalyq máseleler boıynsha jolaýshylarǵa Qazaqstan Respýblıkasynyń sheteldegi mekemeleriniń jedel baılanys jelilerine múmkindiginshe tez ýaqytta habarlasý kerek.

Buǵan deıin Taıaý Shyǵystaǵy ahýaldyń ýshyǵýyna baılanysty QR Syrtqy ister mınıstrligi Qazaqstan azamattaryna shet memleketterdegi dıplomatııalyq ókildikterdiń jedel baılanys jáne «jedel jeli» nómirlerin usyndy.