Taıaý Shyǵysta radıatsııalyq ahýal turaqty kúıinde qalyp otyr
ASTANA. KAZINFORM – Halyqaralyq atom energııasy agenttiginiń málimetinshe, Izraıl men AQSh-tyń Iranǵa qarsy áskerı operatsııasy barysynda jasalǵan soqqylar ázirge Taıaý Shyǵystaǵy radıatsııalyq ahýaldyń ózgerýine ákelmegen, dep habarlaıdy DW.
Halyqaralyq atom energııasy agenttigi 28 aqpan, senbi kúni X áleýmettik jelisinde qazirgi ýaqytta aımaqta radıatsııalyq jaǵdaıdyń ózgerisi tirkelmegenin málimdedi.
— Agenttik Taıaý Shyǵystaǵy oqıǵalardyń damýyn muqııat qadaǵalap otyr jáne aımaq halqy úshin ıadrolyq qaýipsizdikke tónetin kez kelgen qaterdiń aldyn alý maqsatynda ustamdylyq tanytýǵa shaqyrady, — delingen habarlamada.
Agenttik óńir elderimen turaqty baılanysta ekenin jáne jaǵdaı týraly aqparat berýdi jalǵastyratynyn qosty.
Sonymen qatar, Irannyń Venadaǵy halyqaralyq uıymdar janyndaǵy turaqty ókildigi Agenttik Basqarýshylar keńesiniń kezekten tys otyrysyn ótkizýdi surady.
Dúısenbi, 2 naýryz kúni josparlanǵan sessııaǵa deıin arnaıy otyrys ótkizýdi Reseı de suraǵan. Bul týraly Reseıdiń Venadaǵy halyqaralyq uıymdar janyndaǵy turaqty ókili Mıhaıl Ýlıanov X jelisinde habarlady.
Eske salaıyq, buǵan deıin Izraıl Iranǵa soqqy jasaǵan. Keıin Donald Tramp Iranǵa qarsy aýqymdy áskerı operatsııanyń bastalǵanyn jarııalaǵan.
Iran Izraıldiń soltústik jáne ortalyq aımaqtaryna zymyrandar atqan.
Jergilikti buqaralyq aqparat quraldarynyń Qyzyl Jarty Aıǵa silteme jasaýynsha, Iranda 201 adam qaza taýyp, 747 adam jaralanǵan.
