Taıaý Shyǵysta qansha qazaqstandyq júr – QR SІM evakýatsııany jalǵastyrady
ASTANA. KAZINFORM – Syrtqy ister mınıstrliginiń resmı ókili Erlan Jetibaev Taıaý Shyǵys elderinen QR azamattaryn evakýatsııalaý jóninde baspasóz máslıhatyn ótkizdi.
Qazirgi ýaqytqa deıin QR azamattary arasynda zardap shekkender nemese qaza bolǵandar týraly aqparat joq. Evakýatsııa jumystary kezinde zeınetkerlerge, ata-anasymen birge júrgen balalarǵa, júkti áıelderge, kámeletke tolmaǵandarǵa jáne densaýlyǵynda shekteýleri bar adamdarǵa basymdyq beriledi.
– Búgingi tańda Iranda 47 qazaqstandyq, Izraılde – 163, Qatarda – 3 myńnan astam, Birikken Arab Ámirlikterinde – 4 myńnan astam, Saýd Arabııasy koroldiginde shamamen 1800 QR azamattary bar. Olarmen turaqty túrde baılanys bar jáne ahýalǵa qajetti usynymdar berilýde, - dedi E. Jetibaev.
Resmı ókildiń aıtýynsha, búgingi kúnge deıin shıelenis aımaqtarynan 946 azamat aman-esen shyǵaryldy. Jaqynda Oman astanasy Maskat qalasynan Almatyǵa 314 qazaqstandyq mingen reıs ushyp keledi.
– Keıin dál osy baǵyt boıynsha shamamen 230 azamatymyz mingen ekinshi lektiń ushýy josparlanǵan. Osylaısha Omannan búgin-erteń 500-den astam QR azamaty jetkiziledi dep kútilip otyr, - dep tolyqtyrdy ol.
Sonymen birge, búgin erteń Jıdda-Atyraý, Jıdda-Aqtaý baǵyttary boıynsha evakýatsııalyq reıster josparlanǵan. Olarmen 326 azamat elge qaıtarylady dep kútilip otyr.
– Qazaqstandyqtar jerústi joldar arqyly da evakýatsııalanyp jatyr. Atap aıtqanda, Tegeran, Ashhabad jáne Gorgan qalalaryndaǵy sheteldik mekemelerimiz 15 azamatty Iran-Túrkimenstan shekarasy arqyly ótkizdi. Ári qaraı olardyń Aqtaýǵa jetýi úshin kómek kórsetiledi. Áýe keńistigine qoıylǵan eleýli shekteýlerge baılanysty belsendi áskerı is-qımyl toqtap, jaǵdaı tolyq qalpyna kelgenshe Taıaý Shyǵys elderine saparlaýdan bas tartýǵa keńes beremiz, - dedi mınıstrlik ókili.
Eske salsaq, budan buryn Taıaý Shyǵystan qansha qazaqstandyq elge oralǵanyn jazǵan edik.
