Taıaý Shyǵystan azamattarymyzdy evakýatsııaǵa jumsalǵan shyǵyndy anyqtaý múmkin emes — Bektenov
ASTANA. KAZINFORM — Taıaý Shyǵysta ahýal ýshyqqan kezde Qazaqstan azamattaryn evakýatsııalaýǵa jumsalǵan shyǵyndardyń jalpy somasyn anyqtaý múmkin emes. Bul týraly Májilis depýtattaryna Premer-mınıstr Oljas Bektenovtiń jaýabynda aıtylǵan.
— Memleket basshysynyń tapsyrmasymen Qazaqstan Respýblıkasynyń Úkimeti tarapynan Taıaý Shyǵys elderinen Qazaqstan Respýblıkasynyń azamattaryn aýqymdy evakýatsııalaý jumystary júrgizildi. Eskalatsııa bastalǵan sátten bastap ýákiletti organdardyń járdemimen qaqtyǵys oryndarynan elimizge 66 reıs uıymdastyryldy, onyń ishinde 27 reıstiń shyǵyny respýblıkalyq bıýdjet qarajaty esebinen tólenetin bolady. Qalǵan 39 kommertsııalyq reıske bıletterdi azamattar ózderi satyp aldy. Kommertsııalyq reısterdi basqa elderdiń de áýe kompanııalary oryndaǵanyn eskersek, evakýatsııaǵa jumsalǵan shyǵyndardyń jalpy somasyn anyqtaý múmkin emes, — dedi Úkimet basshysy jaýabynda.
Onyń atap ótýinshe, jalpy daǵdarys jaǵdaılaryna jedel áreket etý maqsatynda Qazaqstan Respýblıkasynyń azamattaryn evakýatsııalaý is-sharalaryn uıymdastyrýǵa Qazaqstan Respýblıkasynyń Syrtqy ister mınıstrliginiń «Qazaqstan Respýblıkasy azamattarynyń sheteldegi quqyqtary men múddelerin qorǵaý jónindegi is-sharalardy qamtamasyz etý» bıýdjettik baǵdarlamasy boıynsha qarajat qarastyrylǵan.
«Týrıstik Qamqor» qory Qazaqstan Respýblıkasy azamattarynyń shyǵý týrızmi salasyndaǵy quqyqtaryn kepildendirý júıesiniń ákimshisi sanalady.
— Uıymdastyrylǵan týrıster — bul Kepildendirý júıesine qatysýshy týroperatorlardan týr satyp alǵan, týrıstik kod beriletin tulǵalar. Týrıstik kod týrıstiń Kepildendirý júıesi aıasynda qorǵalatynyn rastaıdy. Taıaý Shyǵys aýmaǵyndaǵy jaǵdaı ýshyqqan kezde onda týrıstik kody bar Qazaqstan Respýblıkasynyń 4 000-ge jýyq uıymdastyrylǵan týrısi bolǵan. Júıe ákimshisi týroperatorlarmen birlesip shamamen 3 000 (úsh myń) uıymdastyrylǵan týrısti ornalastyrý oryndarymen qamtamasyz etip, tamaqtandyrdy. Sonymen qatar olardy keıin evakýatsııalyq jáne repatrıatsııalyq reıstermen jóneltý úshin áýejaılarǵa jetkizý máselesi úılestirildi, — dedi ol.
Aıta keteıik, Májilis depýtaty Serik Erýbaev Premer-mınıstr Oljas Bektenovten Irandaǵy áskerı operatsııalar kezinde Taıaý Shyǵysta qalyp qoıǵan qazaqstandyq týrısterdi elge ákelý bıýdjetke qansha shyǵyn ákelgenin surap, saýal joldaǵan edi.
