Taıaý Shyǵysqa sapar aldynda barlyq táýekel eskerilýi tıis

ASTANA.KAZINFORM — Taıaý Shyǵystaǵy jaǵdaıdyń ýshyǵýyna baılanysty Iran, Izraıl, Sırııa, Irak, Iordanııa jáne Lıvannyń áýe keńistigi, shekaralary jáne mańynda ushýǵa shekteý qoıýyna qaramastan, atalǵan memleketerge týrıstterdiń legi azaıǵan joq. Bul týraly Syrtqy ister mınıstrliginiń resmı ókili Aıbek Smadııarov habarlady. 

— Mınıstrlik azamattardy jaǵdaıdy muqııat qadaǵalap, saparlardy josparlaý kezinde, ásirese Parsy shyǵanaǵy elderine, sonyń ishinde Birikken Arab Ámirlikterine barý barysynda týyndaýy múmkin qaýip-qaterlerdi eskerýge shaqyrady, — dedi Aıbek Smadııarov.

Onyń aıtýynsha, qajet bolǵan jaǵdaıda Qazaqstan azamattarynyń elge oralýy Týrıstik qorǵa jáne áýe kompanııalaryna súıene otyryp qamtamasyz etiledi.

Sonymen qatar resmı ókil memlekettik organdardyń eskertýine qaramastan, sońǵy eki kúnde Qazaqstannan BAÁ baǵytyndaǵy barlyq áýe reısi tolyq ushyp jatqanyn aıtty.

— Taıaý Shyǵys elderine sapar aldynda barlyq táýekeldi eskerip, salmaqty jáne negizdelgen sheshim qabyldaý qajet, — dep atap ótti.

Aıta keteıik, 70-ke jýyq qazaqstandyq Irannan shyǵarylǵanyn jazǵanbyz.