Taıaý Shyǵysqa reıster toqtatylyp jatyr: birqatar áýe kompanııasy shekteý engizdi
ASTANA. KAZINFORM – Lufthansa, Air France jáne ózge de eýropalyq áýe kompanııalary qaýipsizdik jaǵdaıyna baılanysty Taıaý Shyǵys baǵytyndaǵy reısterin ýaqytsha toqtatyp jatyr, dep habarlaıdy Euronews.
Aqparat kóziniń málimetinshe, áýe kompanııalary qaýipti aımaqtardy aınalyp ótetin jańa marshrýttar qurýǵa májbúr nemese keıbir reısterdi tolyqtaı toqtatyp jatyr. Sonyń saldarynan óńirdegi áýe tasymaly kólemi ádettegi deńgeıden aıtarlyqtaı tómendegen.
Turaqsyz jaǵdaı avıatsııa salasyna qosymsha shyǵyn ákelip otyr. Atap aıtqanda, janarmaı baǵasy ósip, ushý ýaqyty uzaryp, kóktem-jaz maýsymyna qatysty josparlaý qıyndaǵan.
Lufthansa Group quramyna kiretin Lufthansa, SWISS, Austrian Airlines, Brussels Airlines, ITA Airways, Edelweiss jáne Lufthansa Cargo kompanııalary Dýbaı men Tel-Avıv baǵytyndaǵy reısterdi 31 mamyrǵa deıin toqtatty.
Al Lufthansa Cargo Tel-Avıvke ushýdy 30 sáýirge deıin toqtatady. Sonymen qatar top Abý-Dabı, Amman, Beırýt, Dammam, Er-Rııad, Erbıl, Maskat jáne Tegeran baǵyttaryna reısterdi 24 qazanǵa deıin ýaqytsha toqtatatynyn málimdedi.
Eurowings kompanııasy da Tel-Avıv, Beırýt jáne Erbılge reısterdi 30 sáýirge deıin, al Dýbaı, Abý-Dabı jáne Amman baǵyttaryn 24 qazanǵa deıin toqtatýdy josparlap otyr.
Air France kompanııasy óńirdegi jaǵdaıdy turaqty baqylap otyrǵanyn málimdedi. Qaýipsizdikke baılanysty Dýbaı men Er-Rııadqa reıster 31 naýryzǵa deıin, al Tel-Avıv pen Beırýtqa reıster 4 sáýirge deıin toqtatylǵan.
BAÁ-niń Emirates, Etihad Airways jáne Air Arabia áýe kompanııalary qysqartylǵan kestemen jumys istep jatyr. Emirates reıster jelisin birtindep qalpyna keltirip jatqanymen, jolaýshylarǵa reıs mártebesin aldyn ala tekserý usynyldy. Etihad naýryzdyń sońyna deıin shamamen 70 baǵyt boıynsha shekteýli kestemen ushady, al Air Arabia negizgi áýejaılardan birqatar reısti qaıta iske qosty.
Nıderlandtyń KLM kompanııasy Iran, Irak, Izraıl jáne Parsy shyǵanaǵy mańyndaǵy keıbir elderdiń áýe keńistigi arqyly ushpaıdy. Tel-Avıvke reıster 11 sáýirge deıin, Dammam men Er-Rııadqa – 17 mamyrǵa deıin, Dýbaıǵa reıster de 17 mamyrǵa deıin toqtatylǵan.
Cathay Pacific Dýbaı men Er-Rııad baǵytyndaǵy reısterdi 31 mamyrǵa deıin toqtatty. Kompanııa jolaýshylarǵa ózgerister týraly habar berilgenin jáne jaǵdaıdy baqylap otyrǵanyn málimdedi. Sonymen qatar Eýropaǵa suranys artqandyqtan, Parıj ben Tsıýrıhke qosymsha reıster ashylady.
Air India jáne Air India Express 24 naýryz kúni Batys Azııaǵa jáne keri baǵytta 24 reıs oryndaıdy. Onyń ishinde Úndistan men Saýd Arabııasynyń Djıdda qalasy arasynda 10 reıs josparlanǵan. Sondaı-aq Maskat pen BAÁ baǵyttaryna qosymsha reıster qarastyrylǵan.
Qatar Airways 28 naýryzǵa deıin shekteýli kestemen jumys isteıdi. Ýaqytsha keste Dohany álemniń 70-ten astam baǵytymen baılanystyrýǵa múmkindik beredi.
British Airways Taıaý Shyǵys baǵytyndaǵy reıster sanyn qysqartty. Amman, Bahreın, Dýbaı jáne Tel-Avıvke reıster 31 mamyrǵa deıin, al Dohaǵa reıster 30 sáýirge deıin toqtatylǵan.
Gulf Air Bahreın áýe keńistigi jabylǵandyqtan, Saýd Arabııasynyń Dammam qalasynan arnaıy reıster uıymdastyryp jatyr. Bul reıster Parıj, Manıla, Kaır, Kasablanka, Frankfýrt, London, Mýmbaı jáne Bangkok baǵyttaryna oryndalady.
Oman Air keıbir baǵyttardy ýaqytsha toqtatty. Amman, Dýbaı, Bahreın, Doha, Dammam, Kýveıt, Kopengagen, Baǵdad jáne Hasab qalalaryna reıster 31 naýryzǵa deıin oryndalmaıdy.
Philippine Airlines Manıla – Doha jáne Manıla – Dýbaı baǵyttaryn 30 sáýirge deıin toqtatty.
Virgin Atlantic Dýbaıǵa maýsymdyq reısterin qysqy maýsym sońyna deıin toqtatty, al Er-Rııadqa ushý keminde 25 naýryzǵa deıin toqtatylǵan.
Wizz Air Izraılge reısterdi 29 naýryzǵa deıin, al Eýropadan Dýbaı, Abý-Dabı, Amman jáne Djıddaǵa reısterdi qyrkúıek ortasyna deıin toqtatty.
Turkish Airlines Bahreın, Dammam, Er-Rııad, Iran, Irak, Iordanııa, Kýveıt, Lıvan, Oman, Qatar, Sırııa jáne BAÁ baǵyttaryna keıbir reısti toqtatty.
Air Canada Dýbaıǵa reısterdi 30 sáýirge deıin, al Tel-Avıvke reısterdi 2 mamyrǵa deıin toqtatty.
Garuda Indonesia Doha baǵyty boıynsha reısterdi arnaıy sheshim shyqqanǵa deıin ýaqytsha toqtatty.
Buǵan deıin bıyl qandaı jańa halyqaralyq áýe reısteri ashylatyny habarlandy.
