Taıaý Shyǵys elderinde qoı jáne qus etiniń eksporty artady – Saýda mınıstri

ASTANA. KAZINFORM – Qytaıǵa daıyn ónimniń eksportyn 2,5 esege ulǵaıtý josparlanyp otyr. Bul týraly Úkimet otyrysynda Saýda jáne ıntegratsııa mınıstri Arman Shaqqalıev málim etti.

«2029 jylǵa qaraı eksport kólemin 45 mıllıard dollarǵa jetkizý úshin negizgi baǵyttar anyqtaldy. Eń aldymen, Qytaıǵa basym nazar berilip otyr. Orta merzimdi perspektıvada daıyn ónimniń eksportyn 2,5 esege ulǵaıtý jáne 12,5 mlrd dollarǵa deıin jetkizý maqsatyn aldymyzǵa qoıyp otyrmyz (2023 jyldyń qorytyndysy boıynsha QHR-ǵa shıkizattyq emes taýarlardyń eksporty 5 mlrd dollardy qurady)», - dedi A. Shaqqalıev.

Onyń aıtýynsha, Eýrazııalyq ekonomıkalyq odaq jáne Ortalyq Azııa elderimen taýar aınalymyn arttyrý boıynsha qarqyndy jumys atqarylyp jatyr, shekara mańyndaǵy saýdanyń tıisti ınfraqurylymy qurylýda.

«Taıaý Shyǵys elderinde suranysy joǵary tońazytylǵan qoı eti, qus eti jáne ózge de taýarlardy jetkizýdi ulǵaıtý pysyqtalyp jatyr. Biz úshin qazaqstandyq azyq-túlik jáne organıkalyq ónimderdi satyp alýǵa, sondaı-aq eksportqa baǵdarlanǵan jobalardy iske asyrý baǵytynda jumys isteýge daıyn Eýropa odaǵynyń naryqtary da basym baǵyt retinde sanalady», - dedi mınıstr.