Taıaý Shyǵys: «Ash-Shıfa» aýrýhanasynan 31 náreste evakýatsııalandy

Dúnıejúzilik densaýlyq saqtaý uıymynyń ókilderi bastaǵan BUU-nyń gýmanıtarlyq jaǵdaıdy baǵalaý jónindegi birlesken toby Gazanyń soltústigindegi «Ash-Shıfa» aýrýhanasyna bardy, dep habarlaıdy Kazinform BBC agenttigine silteme jasap.

Budan soń palestınalyq Qyzyl Jarty Aı uıymynyń jedel járdem brıgadasy BUU men DDSU úılestirýmen Gazadaǵy «Ash-Shıfa» aýrýhanasynan shala týǵan 31 náresteni evakýatsııalady.

Qaýipsizdikke baılanysty berilgen shekteýli ýaqytta komanda aýrýhana ishinde 1 saǵat ýaqyt qana bola aldy. Komanda músheleri bul ýaqytty «ajal aýmaǵy» al ondaǵy jaǵdaıdy «jantalas» dep atady.

Málimdemede top ókilderi aýrýhananyń atqylanǵanyn, kiriberistegi 80-nen astam adam jerlengen molany kórgenin jetkizgen.

Keıingi 6 aptada taza sý, otyn, dári-dármekter men azyq-túlik sııaqty ózge de birinshi kezekte kerek zattardyń jetispeýi saldarynan, kezinde Gaza sektoryndaǵy eń iri, eń zamanaýı, eń jaqsy jabdyqtalǵan «Ash-Shıfa» aýrýhanasy medıtsınalyq mekeme retinde qyzmetin toqtatty, delingen DDSU málimdemesinde.

Aýrýhanaǵa barǵan top ókilderi qaýipsizdikpen baılanysty jaǵdaıdyń saldarynan medıtsına mamandary aýrýhanadaǵy qaldyqtardy tıimdi joıa almaǵanyn aıtady. Sonyń saldarynan aýrýhananyń dálizi men aýmaǵy medıtsınalyq jáne qatty qaldyqtarǵa sondaı-aq ózge de qoqysqa tolǵan. Bul óz kezeginde aýrý juqtyrý qaýpin arttyryp otyr.

Halyqaralyq uıymnan kelgen top ókilderi tildesken medıtsınalyq personaldar men patsıentter óz ómiri men densaýlyǵy úshin qorqatynyn aıtyp, evakýatsııalaýdy surady, delingen DDSU saıtyndaǵy málimdemede.

Onda sonymen qatar aýrýhanada 25 medıtsına mamany men 291 patsıent qalǵany aıtylǵan. Eń soraqysy keıingi 2-3 kúnde birneshe patsıent medıtsınalyq kómek kórsetý jumystary toqtatylǵan soń kóz jumǵan.

Patsıentterdiń arasynda densaýlyq jaǵdaıy óte nashar 32 náreste bar, jeldetý júıesi joq ıntensıvti terapııa bóliminde 2 adam jatyr, 22 adam dıalızde jatyr, olardyń ómiri úshin mańyzdy bolyp tabylatyn emdeýge múmkindik joq.

Keıinirek palestınanyń Qyzyl Jarty Aı uıymy qoǵamy 31 shala týǵan náresteniń «Ash-Shıfa» aýrýhanasynan sátti evakýatsııalanǵanyn jetkizdi.