Taıaý kúnderi Almatyda elimizdegi balalar taǵamyn shyǵaratyn alǵashqy zaýyt iske qosylady

Bul týraly búgin elordada bastalǵan Túrki álemi pedıatrlarynyń 10-shy halyqaralyq kongresi aıasynda BAQ ókilderine suhbat bergen Qazaq taǵamtaný akademııasynyń prezıdenti Tóregeldi Sharmanov málim etti.

«Bul naǵyz balalardyń densaýlyǵyna laıyqtalǵan, ádeıi arnalyp jasalǵan taǵam túrleri. Óıtkeni ol dárýmendermen, mıkroelementtermen baıytylǵan. Sondyqtan bul zaýyttyń orny da erekshe jáne ol álemdegi Qazaqstannyń erekshe kelbetin kórsetedi», degen ol mekemeniń ataýy Qazaq taǵamtaný akademııasynyń Amıran zaýyty bolatyndyǵyn jetkizdi.

Jalpy onyń aıtýynsha, bundaı zaýyt burynǵy Keńes odaǵynyń quramynda bolǵan elderdegi eń alǵashqy biregeı zaýyt bolyp sanalady. Onda quny óte qymbat turatyn venger tehnologııa qoldanylady. Al shyǵaratyn ónimdi qazaq taǵamtaný akademııasy sheshedi.

«Ónimderimiz tek qana tabıǵı bolady ári onyń sapasyna jıi baqylaý júrgizemiz. Zaýyt janynan zamanaýı qural-jabydyqtarmen jaraqtanǵan sapa baqylaý zerthanasy ashylady», dedi T.Sharmanov.

Aldaǵy josparymen bólisken akademık eshki, soıa sútteriniń negizinen balalar taǵamy zaýytyn salatyndyqtaryn jetkizdi. Sondaı-aq alǵashqy zaýyt iske qosylyp, ózin-ózi aqtaı bastasymen, memleket, Úkimet aldynda osyndaı zaýyttardy elimizdiń túpkir-túpkirinde salý máselesin kótermek oıyn da atap ótti. Akademıktiń paıymynsha, respýblıka sábılerin tolyǵymen balalar taǵamymen qamtamasyz etý úshin keminde elimizge áli de 5 zaýyt qajet eken.