Taıaý aralyqta Qazaqstanǵa naryqtyq ekonomıkaly el mártebesi berilýi múmkin - T.Jaqsylyqov
ASTANA. QazAqparat - Taıaý aralyqta Qazaqstanǵa naryqtyq ekonomıkaly el mártebesi berilýi múmkin. Bul týraly búgin Berlın eýrazııalyq klýbynyń 10-shy otyrysynda QR Ekonomıka jáne bıýdjettik josparlaý vıtse-mınıstri Tımýr Jaqsylyqov málim etti.
«Bizdińshe, Eýropa men Qazaqstan arasyndaǵy saýda-ınvestıtsııalyq áleýet Qazaqstanǵa naryqtyq ekonomıkaly el mártebesin berý jolymen keńeıtýge bolady. Qazirgi ýaqytta bul baǵyttaǵy kelissózder júrgizilýde. Ol taıaý aralyqta aıaqtalyp, bul mártebege ıe bolatyndyǵymyzǵa senim artamyz», - dedi vıtse-mınıstr. T.Jaqsylyqovtyń atap ótýinshe, Qazaqstan men Eýroodaq elderi arasyndaǵy ózara saýda kólemi turaqty ósim kórsetip keledi.2013 jyldyń qorytyndysynda ol shamamen 54 mlrd. AQSh dollaryn qurady. Bul Qazaqstannyń jalpy taýar aınalymynan 40 paıyzǵa artyq. «Onyń ishinde Qazaqstan men Germanııa arasyndaǵy taýar aınalymy 3,2 mlrd. dollarǵa jetti», - dedi ol.
