Taıaý aralyqta Qazaqstanda mys, qorǵasyn-myrysh jáne altyn keni salalarynda daǵdarys týyndaýy múmkin

Bul týraly búgin «KAZENERGY» qaýymdastyǵynyń munaıgaz salasyn damytý jónindegi úılestirý keńesiniń otyrysynda «QazMunaıGaz» UK» AQ basqarma tóraǵasynyń geologııa jáne perspektıvaly jobalar jónindegi orynbasary Qurmanǵazy Esqazıev málim etti.

«Búginde eldiń rezervtik mıneraldy-shıkizattyq bazasy bolyp tabylatyn ázirlengen perspektıvaly qurylymdarynyń barynsha azaıǵandyǵy naqty aıqyndaldy», - dep atap ótken onyń sózine qaraǵanda, geologııalyq barlaý jumystaryn júrgizýdiń ǵylymı negizdelgen kezeńderinde qatelikter oryn alýda. Osy jáne basqa da jaıttar ken oryndarynyń ashylýyna keri áserin tıgizip otyr.

Q.Esqazıevtiń sózine qaraǵanda, barlanǵan qorlardy ıgermeýdiń saldarynan qatty paıdaly qazbalardyń barlyq túrleri boıynsha jyl saıynǵy qarqyn 0,5-den 1,7 paıyzǵa deıin tómendeýde. Nátıjesinde respýblıkadaǵy mys qory 25, qorǵasyn men myrysh 17, altyn 30 jyldan keıin taýsylýy múmkin. Al jańa ken oryndaryn ashý múmkinshiligi múldem joq desek te bolady. Óıtkeni sońǵy 50 jyldyń ishinde júrgizilgen túrli barlaý jumystarynyń nátıjesinde jer betine jaqyn jatqan qatty paıdaly qazbalardyń barlyǵy da ashylǵan.

«Egerde izdeýden bastap ken ornyn daıyndaǵanǵa deıin keminde 15 jyl ýaqyt ketetinin eskersek, onda taıaý aralyqta respýblıkanyń mys, qorǵasyn-myrysh, altyn kenderi salalarynda daǵdarystyń týyndaý múmkindigi aıqyn», - dedi Q.Esqazıev.