Taıaý 3 jyldyń ishinde elimizde 200 myńnan astam turaqty jańa jumys oryndary ashylady
Bul týraly Memleket basshysy Nursultan Nazarbaev búgin Parlament palatalarynyń birlesken otyrysynda jarııalaǵan Qazaqstan halqyna arnaǵan dástúrli Joldaýynda aıtty.
«Meniń tapsyrmam boıynsha Úkimet údemeli ındýstrııalyq damý memlekettik baǵdarlamasyn jáne eldi ındýstrııalandyrýdyń detaldi kartasyn ázirledi. Men bul týraly ótken jyly «Nur Otan» partııasynyń sezinde aıtqan bolatynmyn. Bul eki qujat taıaý 5 jylda qaıda, qaı jerde, ne salatynymyzdyń tolyq jospary», dedi Memleket basshysy.
Elbasynyń aıtýynsha, búgingi kúni jalpy ınvestıtsııa kólemi 6,5 trıllıon teńgeni quraıtyn 162 jobany júzege asyrý qolǵa alynǵan. Bul eldiń ishki jalpy óniminiń 40 paıyzdan astamyn quraıdy. Atalǵan jobalardy iske asyrý taıaý 3 jyldyń ishinde elimizde 200 myńnan astam turaqty jańa jumys oryndaryn qurýǵa múmkindik beredi.
«5 jyldyń ishinde qýatty gaz-hımııalyq keshen, mıneraldyq tyńaıtqyshtar shyǵaratyn zaýyttar, Balqash JES, Moınaq SES, Ekibastuz GRES-2 jańa blogy sııaqty birqatar iri elektr stansylary sııaqty aýqymdy jobalar júzege asatyn bolady», dedi QR Prezıdenti Qazaqstan halqyna arnalǵan dástúrli Joldaýynda.
