Taıaý 2-3 aptada kókónis pen jemis-jıdek baǵasy kúrt arzandaıdy
«Suranystyń qamtamasyz etilmeýi degen túsinik bar. Jabyq topyraqta ósirilgen kókónistiń, máselen qııardyń kelisi qańtar-aqpan aılarynda 90-nan 800 teńgege deıin aýytqyp turady. Eger múmkinshilikter jaıynda aıtar bolsaq, onda Qazaqstan ózin qamtamasyz etýmen qatar eksportqa shyǵarýǵa da múmkindigi bar. Sondyqtan da qazirgi ýaqytta qııar men qyzanaq 400-500 teńgeden satylyp jatyr deıtin bolsaq, onda onyń qunynyń basym bóligin jylyjaıdy jylytýǵa ketetin shyǵyn quraıdy», - dedi E.Eseneev.
Onyń atap ótýinshe, qazirdiń ózinde elimizdiń ońtústiginen kókónis túrleriniń kelýi kóleminiń birshama artqanyn baıqaýǵa bolady.
«Qııardy bazardan kelisin 200-300 teńgeden de tabýǵa bolady. Eger qazaqstandyq ónim baǵasy jaıynda aıtar bolsaq, onda ol salystyrmaly túrde anyqtalady. Taıaýda ǵana bizde qytaılyq seriktestermen ekijaqty kezdesý ótti. Men sizderge bizdiń ónimniń sapasy da, quny da barynsha tartymdy ekendigin aıta alamyn. Olarda et 3 ese, ósimdik maı men un eki ese qymbat», - dedi ol.
Sonymen qatar, ol elordada arzan baǵamen qııardy qaıdan alýǵa bolatyndyǵyn da aıtyp berdi.
«Men sońǵy ret «Eýrazııa» saýda ortalyǵynan senbi kúni satyp aldym. Ońtústikqazaqstandyq óndirýshilerdiń qııarynyń 1 kelisi 300 teńdegen boldy. Qazirgi ýaqytta Qazaqstannyń ońtústiginde jylyjaıdan ashyq topyraqqa kóshirý bastalyp ta ketti. Taıaý eki-úsh aptanyń ishinde baǵa birden kúrt tómendeıdi. Óıtkeni, usynys barynsha mol bolady», - dedi E.Eseneev.