Tax Free pılottyq jobasynyń ýaqyty uzartylmaq

ASTANA. KAZINFORM – Tax Free pılottyq jobasy 2025 jyldyń sońyna deıin uzartylmaq. Qarjy mınıstrliginiń tıisti buıryq jobasy ashyq normatıvtik-quqyqtyq aktiler portalynda jarııalandy.

Aıta keteıik, Tax Free pılottyq jobasy Qazaqstan Respýblıkasynyń aýmaǵynda sheteldik týrısterdi tarta otyryp, kelý týrızmin damytý jáne kásipkerlik sýbektileriniń aınalymyn arttyrý maqsatynda týrısterge (shet memleketterdiń azamattaryna) taýarlardy EAEO kedendik aýmaǵynan tysqary jerlerge áketý kezinde keminde 20 eń tómengi eseptik kórsetkish mólsherinde QQS somasyn óteýdi kózdeıdi.

Joba 2019 jyldyń 15 tamyzy men 2024 jyldyń 31 jeltoqsany aralyǵynda júzege asyrylyp jatyr. Endi ol taǵy bir jylǵa uzartylmaq.

Buıryq jobasy 18 jeltoqsanǵa deıin qoǵamdyq talqylaýda bolady.

Buǵan deıin týrıster endi Býrabaı tabıǵatyn tikushaqpen tamashalaı alatyny týraly jazdyq.