Tax free: Qazaqstanda sheteldik týrısterge QQS qaıtaryla bastady
ASTANA. KAZINFORM — Qazaqstanda sheteldik týrısterge satyp alǵan taýary úshin QQS-ty qaıtarýǵa múmkindik beretin «Tax free» pılottyq jobasy iske qosyldy.
Jobaǵa sáıkes, EAEO-ǵa múshe memleketterdiń azamattaryn qospaǵanda, sheteldik týrıster Qazaqstannan taýar áketken kezde QQS somasynyń bir bóligin ótemaqy retinde qaıtara alady. Bul týraly QR Qarjy mınıstrliginiń Memlekettik kirister komıteti habarlady.
QQS kimge qaıtarylady
«Tax free» júıesi arqyly jalpy quny keminde 10 AEK, ıaǵnı 2026 jyly 43 250 teńge bolatyn azyq-túlikke jatpaıtyn taýarlardy satyp alǵan sheteldik týrısterge QQS ótemaqysy beriledi.
«Tax free» qujatyn satýshy QQS somasy kórsetilgen kassalyq chek negizinde qaǵaz nemese elektrondy túrde rásimdeıdi.
Joba qaı qalalarda jumys isteıdi
Pılottyq joba Almaty, Astana, Aqtaý, Aqtóbe, Atyraý, Balqash, Qaraǵandy, Qostanaı, Pavlodar, Petropavl, Semeı, Taraz, Túrkistan, Oral, Óskemen (Qaton-Qaraǵaı) jáne Shymkent qalalaryndaǵy, sondaı-aq Aqmola oblysynyń Býrabaı kentindegi statsıonarlyq saýda nysandarynda júzege asyrylady.
QQS ótemaqysyn «Tax free» júıesiniń operatory júzege asyrady.
Kásipkerlerge qandaı múmkindik beredi
Jobaǵa atalǵan eldi mekenderde jumys isteıtin, QQS tóleýshi jáne statsıonarlyq saýda nysandarynda azyq-túlik emes taýarlardy bólshek saýdada satatyn jeke kásipkerler qatysa alady.
«Tax free» júıesine qosylý jáne ony bıznes úshin paıdalaný tegin. Qatysý úshin kásipkerler taxfree.kz jáne/nemese Global Blue arqyly júıe operatorlarymen shart jasasýy qajet.
Júıege qosylý sheteldik týrısterdi taýar satyp alýǵa tartýǵa, satý kólemi men ortasha chekti arttyrýǵa, saýda núktesiniń básekege qabilettiligin kúsheıtýge jáne sheteldik týrısterge halyqaralyq deńgeıde QQS qaıtarý qyzmetin usynýǵa múmkindik beredi.
Eske salaıyq, buǵan deıin 2026 jyly Tax free jobasy Qazaqstannyń 20 qalasyna engiziletini jóninde habarlaǵanbyz.
