Taýyq buryn paıda boldy ma, álde jumyrtqa ma?
ASTANA. 6 naýryz. QazAqparat - Álmısaqtan beri taýyq buryn paıda boldy ma, álde jumyrtqa buryn ba degen suraq ǵalymdy da, fılosofty da, qarapaıym adamdy da mazalap kele jatqany jasyryn emes.
Alaıda bul suraqtyń jaýabyn áli eshkim taba alǵan joq. Degenmen, jýyrda ǵana genetık-ǵalym, fılosofııa maıtalmany jáne qus fermasynyń qojaıyny - úsh salanyń ókili birigip, bul suraqtyń jaýabyn taýypty, dep habarlaıdy positime.ru saıty.
Olardyń sheshimi boıynsha, dúnıede birinshi bolyp jumyrtqa paıda bolypty. Nottıngem ýnıversıtetiniń evolıýtsııalyq genetıka mamany Djon Brýkfıldtiń aıtýynsha, janýardyń gendik quraýshysy ómir súrý barysynda esh ózgerissiz qalady. Budan shyǵatyny, qazir bizdiń taýyq dep júrgen qusymyzǵa aınalǵan eń alǵashqy qus aldymen jumyrtqanyń ishinde embrıon túrinde bolǵan. Óıtkeni jumyrtqa ishindegi tiri aǵzanyń DNK-sy sol jumyrtqany jaryp shyqqan qustyń DNK-symen birdeı qurylymda. Osy tujyrymdardy zertteı kele, ol evolıýtsııalyq maǵyna boıynsha aldymen jumyrtqa boldy degen sheshimge kelgen.
Bul pikirmen London kolledjiniń professor-fılosofy Devıd Papıno men qus fermasynyń ıesi Charlz Boýrns ta kelisken. Devıd Papıno bul suraqqa bas qatyrmaı bylaı ǵana jaýap bergen: eń alǵashqy balapan jumyrtqadan shyqqan, ıaǵnı jumyrtqa balapannan buryn paıda boldy degen sóz.
Alaıda fılosof eń alǵashqy jumyrtqanyń qaıdan paıda bolǵanyna eshqandaı jaýap bermegen.
