Taýly memleketterdiń azyq-túlik qaýipsizdigin qamtamasyz etý problemalary talqylanady - Bishkek
BІShKEK. Jeltoqsannyń 8-i. QazAqparat /Evgenıı Novıkov/ - Bishkekte jeltoqsannyń 11-inde «Taýly memleketterdiń azyq-túlik qaýipsizdigi» taqyrybyna arnalǵan konferentsııa ótedi.
Qyrǵyz Respýblıkasynyń Taýly aýdandardy damytýdyń ulttyq ortalyǵy bastamashy bolyp otyrǵan bul shara Taýlardyń halyqaralyq kúnine oraılastyrylýda.
2002 jyly Qyrǵyzstan BUU Bas Assambleıasynyń aıasynda Taýlardyń dúnıejúzilik jylyn ótkizý bastamasyn kótergen bolatyn. Taý júıeleriniń Jer halqynyń jartysyn taza sýmen qamtamasyz etip otyrǵan ǵalamshardyń «sý aıdaýshy munaralary» bolyp tabylatyndyǵy atap kórsetildi.
Álemniń ornyqty damýyndaǵy taýlardyń roli men mańyzynyń moıyndalýy BUU Bas Assambleıasynyń birqatar arnaıy qararlar qabyldaýyna negiz boldy. Ol qujattarda halyqaralyq qarjy uıymdaryna, BUU qurylymdary men damyǵan memleketterge taýly elderge ekonomıkalyq jáne tehnologııalyq kómek kórsetýge keńes berilgen.
Qyrǵyz Respýblıkasynyń Taýly aýdandardy damytýdyń ulttyq ortalyǵynyń ókili N.Bıarslanovtyń pikirinshe, klımattyń jahandyq ózgerýi men taýlardaǵy muzdyqtardyń erýi kedeı taýly memleketterdiń qorshaǵan ortanyń jaǵdaıyna táýeldilikterin kúsheıtýde. Munyń saldary búkil ortalyqazııalyq aımaq úshin qaýipti bolýy jáne sý resýrstarynyń jetispeýshiliginen áleýmettik, memleketaralyq problemalardyń oryn alýyna ákelýi múmkin, deıdi sarapshy.
Sharaǵa AQSh, Eýropa, Ortalyq jáne Ońtústik-shyǵys Azııa elderiniń zertteýshileri qatysady.
