Taýly Qarabaqty mınadan tazartyp júrgen orys ofıtseri qaza tapty

TAÝLY QARABAQ. TASS-QazAqparat - Taýly Qarabaqtyń Shýsha degen jerinde aýmaqty mınadan tazartyp júrgen orys ofıtseri qaza tapty, dep habarlaıdy QazAqparat TASS agenttigine silteme jasap.

Bul jaıynda Reseı Federatsııasynyń qorǵanys mınıstrligi málimet taratty.

«17 jeltoqsanda Shýsha eldimekenine jaqyn mańda joldy mınadan tazartyp júrgende jarylǵysh zat jarylǵan. Saldarynan Halyqaralyq mınaǵa qarsy ortalyqtyń ofıtseri aýyr jaraqat aldy» dep málim etti mınıstrlik.

Vedomstvonyń deregine sensek, áskerı qyzmetkerge shuǵyl medıtsınalyq kómek kórsetilgen.

«Gospıtalǵa apara jatqanda ofıtser jarylystan alǵan jaraqatynan qaıtys boldy. Qorǵanys mınıstrligi marqumnyń otbasyna búkil tıisti kómek pen qoldaýdy kórsetedi» delingen habarlamada.