Taýly Qarabaqtaǵy qaqtyǵys: Teketires áli de shıelenisip tur
10 qazanda RF SІM kelistirýshiligimen Ázerbaıjan men Armenııanyń syrtqy ister mınıstrleri gýmanıtarlyq maqsatta atysty toqtatý týraly kelisimge kelgendeı edi. Alaıda bul mámile kópke sozylǵan joq. Taraptar túıisken barlyq núktede qaqtyǵys júrip jatyr. Taraptardyń eki jaǵy da birin-biri aıyptaýda.
Ázerbaıjan Qorǵanys mınıstrliginiń habarlaýynsha qaqtyǵys aýmaǵyndaǵy soltústik jáne ońtústik baǵytta shıelenisken jaǵdaı saqtalyp tur.
«14 jáne 15 qazan kúnderi túngi ýaqytta, aldyńǵy kúnderdeı maıdannyń Agder-Agdam men Fızýlı-Gadrýt-Djebraıl baǵytyndaǵy jaǵdaı ýshyqqan kúıde tur», - deep habarlaıdy ázerbaıjandyq qorǵanys vedomstvosy.
Armenııanyń biryńǵaı aqparattyq ortalyǵy da maıdan shebinen habar taratty.
«Túni boıy jaǵdaı shıelenisken kúıde turdy», - delingen 15 qazandaǵy habarlamada.
Qos tarap ta soǵystyń saldarynan áskerılerden bólek qarapaıym adamdar kóz jumyp jatqanyn habarlaıdy. Osynyń saldarynan qala ınfraqurylymdaryna zaqym kelýde.
Álemdik qaýymdastyqtar taraptardy áli de soǵysty toqtatyp, kelissózderdi qalpyna keltirýge shaqyryp álek. Kelissóz protsesiniń medıatory retinde EQYU-nyń Mınsk toby qaqtyǵys aýmaǵynda atysty toqtatý jáne saıası protsesti bastaýǵa kúsh salýda.
«Áskerıler jelisi boıynsha kezdesý uıymdastyryp, bizdiń qujatta (10 qazandaǵy) kórsetilgendeı, atysty toqtatý týraly mehanızmdi maquldasý kerek. Alaıda bul qujatty taraptardyń eshqaısysy talqylaǵysy da kelmeıdi. Bul sıgnaldardy Ázerbaıjandaǵy jáne Armenııadaǵy áriptesterge jiberdik. Meniń oıymsha, bul – atysty toqtatýdyń negizgi kilti, sebebi soǵystan azamattyq nysandar, beıbit halyq zardap shegip jatyr», - deıdi RF SІM basshysy Sergeı Lavrov BAQ-qa bergen suhbatynda.
Eske sala ketsek 27 qyrkúıekte Ázerbaıjan men Armenııa arasynda Taýly Qarabaq boıynsha qaqtyǵys bastalǵan edi. Ázerbaıjan da, Armenııa da osy jaǵdaıǵa baılanysty soǵys jaǵdaıyn jarııalady. Qazaqstannyń Syrtqy ister mınıstrligi bolsa bul jaǵdaıǵa baılanysty pikir bildirgen bolatyn.
Aýdarǵan: Aıan Bekenuly
