Taýly aımaqtarda kóshkin bolýy yqtımal
ASTANA. 6 aqpan. QazAqparat - «Sınoptıkterdiń boljaý málimetterine qaraǵanda, respýblıkanyń ońtústik oblystarynda kóp mólsherde jaýyn-shashyn bolyp, kúnniń kózi kúrt jylynady.
Osyǵan baılanysty Almaty oblysyndaǵy taý jotalarynda jatqan qar qabaty nyǵyzdalyp, turaqsyzdanady da, qar, laı kóshkinderi júrýi múmkin» dep eskertedi Tótenshe jaǵdaılar jónindegi mınıstrlik, dep jazady «thenews.kz» portaly.
«Qazaq aýa-raıyn boljaý» memlekettik mekemesi aqpannyń 5-i men 11-i aralyǵynda Qazaqstanda aýa-raıy turaqsyz bolady dep boljaıdy. Osy kezeńniń basynda respýblıka aýmaǵynda jaýyn-shashyn jaýady. Elimizdiń soltústiginde boran soǵady. Al shyǵysta túnde aýa temperatýrasy -23, -25 gradýsqa deıin tómendeıdi. Ońtústik óńirlerde kóktaıǵaq bolyp, jeldiń qýaty sekýndyna 15-20 metrge deıin jetedi, deıdi mamandar. Erigen qardyń, jıi jáne birneshe kún boıy tolastamaı jaýatyn jańbyrdyń sýy taýly aımaqtarda kóshkin júrýine sebep bolady. Aqpan, naýryz aılarynda taý qyrattarynan túsetin qar kóshkinderi jıi bolady. Kún jylyp, qar erip bolǵanda laı kóshkinderi bastalady.
Sondyqtan qutqarý qyzmeti jyldyń osy mezgilinde taýǵa baratyndarǵa kóshkinnen saq bolýdy eskertedi.
