Táýlik ishinde Kúnde 29 jarqyl tirkeldi

ASTANA. KAZINFORM — Bir táýlikte Kúnde 29 jarqyl tirkeldi, bul 2000 jyldan bergi eń joǵary kúndelikti kórsetkish, ıaǵnı 2022 jyldyń mamyrynda jáne 2024 jyldyń jeltoqsanynda ornatylǵan rekordpen teń. Bul týraly Reseı Ǵylym akademııasynyń Ǵaryshtyq zertteýler ınstıtýty málimdedi.

Za vyhodnye na Solntse proızoshlo svyshe polýsotnı vspyshek
Foto: spec.tass.ru

NOAA álemdik katalogine sáıkes, barlyq 29 jarqyl bir táýlik ishinde boldy. Buǵan deıin týra osynsha jarqyl 2022 jyldyń 5 mamyrynda jáne 2024 jyldyń 10 jeltoqsanynda baıqalǵan. Degenmen, Kúnde 21 ǵasyrda jarqyldar sany 30-ǵa jetken emes. 

— Bul oqıǵanyń ereksheligi sol, barlyq jarqyl 4566 nómirli bir daqtar tobynda boldy. Qazirgi ýaqytta ol Kún dıskisiniń ortalyq bóliginde ornalasqan. Salystyrý úshin, 2022 jyldyń mamyr aıynda jarqyldar eki Kún daqtary tobynda, al 2024 jyldyń jeltoqsanynda bes daqtar tobynda tirkelgen bolatyn, — delingen esepte.

Bulardyń kópshiliginde C jáne M klasyna jatatyn jarqyldar basym boldy. Sarapshylardyń baǵalaýy boıynsha, salystyrmaly túrde qýaty azdaý ári jıi bolatyn jarqyldar erekshe qýatty jarylystarǵa qajet energııanyń jınalýyna jetkilikti ýaqyt qaldyrmaýy múmkin. Kún belsendiliginiń bul úlgisi Jerge jekelegen, óte qýatty jarqyldarǵa qaraǵanda azyraq qaýip tóndiredi.

Rekordtyq deńgeıdegi osy jarqyldyń barlyǵy 2020 jyly bastalǵan Kún tsıklinde tirkelip otyr. Buǵan deıingi eki tsıklde jekelegen jarqyldardyń qýaty joǵary boldy. 2020 jyldan beri Kúnde X10 nemese odan joǵary klasty birde-bir jarqyl tirkelgen joq. 

Kúnniń jarqyldary rentgen sáýleleriniń qýaty boıynsha bes klasqa jikteledi: A, B, C, M jáne X. Olar Jerde energetıkalyq júıelerdiń jumysyna, qustar men janýarlardyń kóshi-qonyna áser etetin, sondaı-aq polıarlyq shuǵylalardyń baqylaý aımaǵyn keńeıtetin magnıttik daýyldardy týdyrýy múmkin.

18 qańtar keshinde tirkelgen 2026 jylǵy alǵashqy qýatty kún jarqyly X1,9 deńgeıine jetken bolatyn. 

Keshe Kúnnen bólinip shyqqan plazma aǵynynyń Jerge jetýinen, ǵalamsharda Kp5+ ındeksimen magnıttik daýyl tirkeldi.