Táýliktik balapan ımportyna jyl saıyn 1 mlrd. teńgeden astam qarjy jumsalýda - Aýyl sharýashylyǵy mınıstri
ANA. 8 qarasha. QazAqparat /Qanat Mámetqazyuly/ - Elimizdegi qus fabrıkalary asyl tuqymdyq jumyrtqa jáne táýliktik balapan ımportyna jyl saıyn 1 mlrd. teńgeden astam qarjy jumsap jatyr.
Búgin Parlament Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti.
«Asyl tuqymdy qus sharýashylyǵynyń bazasyn damytý birqatar sharalardy qabyldaýdy qajet etedi. Qazir bizde jumyrtqa baǵytyndaǵy qus sharýashylyǵynyń asyl tuqymdyq bazasy joq. Sondyqtan da osy turǵydan biz tolyǵymen ımportqa táýeldi bolyp otyrmyz. Máselen, elimizdegi qus fabrıkalary asyl tuqymdyq jumyrtqa jáne táýliktik balapan ımportyna jyl saıyn 1 mrld. teńgeden astam qarjy jumsaýda», dedi A. Kúrishbaev.
Mınıstrdiń sózine qaraǵanda, atalǵan máseleni sheshý úshin «Astana qus» mamandandyrylǵan asyl tuqymdy sharýashylyqtyń qýatyn arttyrý, sondaı-aq 2 jekemenshik asyl tuqymdy reprodýktordy qurý sharalary qarastyrylady.
