Táýlik ishinde Astanada kisi ólimine qatysty eki qylmys jasaldy
ASTANA. 15 tamyz. QazAqparat - Astanalyq ІІD-niń «Saryarqa» aýdandyq ІІB qyzmetkerleri kisi óltirdi degen kúdikpen 35 jastaǵy Soltústik Qazaqstan oblysynyń turǵynyn ustady.
Tekserý barysynda ustalǵan áıel er adammen birge úı jaldap turǵany jáne spırtti ishimdikterge jıi áýes bolǵandyǵy anyqtaldy. Osyndaı «toılatýdyń» birinde ekeýiniń arasynda janjal týyndap, áıel erkekti pyshaqtap tastaǵan. Ol alǵan jaraqattarynan oqıǵa ornynda mert boldy.
Áıel qylmysy týraly kórshisine aıtyp, ol jedel járdem shaqyrǵan. Oqıǵa ornyna kelgen polıtsııa qyzmetkerlerine áıel istegen qylmysyn moıyndaǵan. Atalǵan oqıǵa boıynsha qylmystyq is qozǵaldy. Ustalǵan azamatsha Astana qalalyq ІІD-niń ýaqytsha ustaý abaqtysyna qamaldy.
Sonymen qatar, elordalyq ІІD «Almaty» aýdandyq ІІB qyzmetkerleri de taǵy bir aýyr qylmystyń betin ashty.
Oqıǵa ornyna barǵan jedel tekserý tobynyń qyzmetkerleri bir páterdi jaldap turyp jatqan Ózbekstannyń eki azamaty sózge kelip qalǵanyn anyqtady. Janjaldyń arty birte-birte tóbeleske ulasyp, bireýi ekinshisine pyshaq suqqan. Jaraqattan er adam sol jerde qaza boldy.
Ustalǵan azamat qylmysyn moıyndady. Atalǵan fakti boıynsha qylmystyq is qozǵalyp, tergeý amaldary júrgizilýde.
