Táýlik boıy jumys isteıtin «Sammıt TV» jańa telearnasy óz jumysyn bastady - «Habar» agenttigi
ASTANA. 25 qarasha. QazAqparat - Astanada ótetin Eýropadaǵy Qaýipsizdik jáne yntymaqtastyq uıymynyń Sammıti qarsańynda «Sammıt TV» telearnasy jumys isteıtin boldy, dep habarlaıdy «Habar» agenttiginiń baspasóz qyzmeti.
Bul kúnderi álem nazary Qazaqstanǵa aýyp otyrǵandyqtan, elimizde bolyp jatqan jańalyqtar retin dúıim halyq osy arnadan bile alady. «Sammıt TV» «Habar» agenttiginiń spýtnıktik júıede aqparat taratatyn «Kaspıonet» arnasy arqyly kórsetiledi.
«Sammıt TV» arnasy búgin efırge shyqty. Eýropadaǵy Qaýipsizdik jáne yntymaqtastyq uıymy Sammıtine kelgen qonaqtar, olardyń oı-pikirleri, qabyldanǵan sheshimder jaıly tolyq aqparatty osy telearna, 24 saǵat boıy aǵylshyn tilinde taratyp otyratyn boldy. Daıdjest retinde júretin 10-mınýttyq jańalyqtar saǵat saıyn jańalanyp otyrsa, kún saıyn keshki saǵat onda efırge arnaıy jańalyqtar bıýlleteni shyǵady. Ony Djonatan Nıýell júrgizedi.
Jańalyqtardan bólek, arnada sol kúnniń aıtýly suhbattary da berilip, qulaq quryshyn qandyrar qazaq klassıkasy men estradalyq ánder qoıylady. Árıne, barlyǵy aǵylshyn tilinde bolǵandyqtan, bul kúnderi aýdarmashylar sanyn 4 esege arttyrýǵa týra keldi, - deıdi áriptesterimiz. «Kaspıonet» telearnasynyń ujymy, qaınap turǵan qazandy eske saldy. Sebebi, jańa arnanyń bar aýyrtpalyǵy osy azamattardyń moınynda.
«Sammıt TV» telearnasynyń bezendirilýi de joǵarǵy deńgeıde. Sondaı-aq, osy arnadan ótken barlyq aqparatty kórermen qaýym, Onlaın tártibinde «Kaspıonet» saıtynan kóre alady. 25-qarashadan 3-jeltoqsanǵa deıin jumys isteıtin, búkil oqıǵa men jańalyqty jedel jetkizip otyratyn «Sammıt TV» elimizdiń ımıdjin qalyptastyrýdy maqsat etedi.
