Táýlik boıy qazaqsha habar taratatyn arna ashylsa rýhanı ómirimizdegi tarıhı oqıǵa bolar edi - A. Smaıyl

Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Aldan Smaıyl osylaı málim etti.

Óz sózinde A. Smaıyl teleradıo habarlaryn taratýdaǵy tyń bastamalarǵa toqtala kele, Baılanys jáne aqparat mınıstrliginiń bul baǵytta nátıjeli jumys júrgizip otyrǵanyn tilge tıek etti. Onyń aıtýynsha, mınıstrliktiń teleradıo salasyndaǵy qazirgi qyzmeti Eýrokomıssııanyń 2005 jyly sandyq televıdenıege kóshý jónindegi sheshimine sáıkes óristetilýde. «Jospar boıynsha respýblıkamyzda sandyq efırlik televıdenıege kóshý ústimizdegi jyly jańa sapada jalǵasyn tabady. Qaraǵandy oblysynda júzege asyrylatyn ilki joba búkil elimizdi qamtıdy. 2015 jyly sandyq televıdenıeniń jetistikterine qazaqstandyqtardyń 98 paıyzy kýá bolady. Taıaý ýaqytta «Mádenıet», «Bilim», «Іsker» telearnalary ana tilimizde habar taratpaq», - dedi depýtat.

Onyń aıtýynsha, sandyq televıdenıe rýhanı qundylyq bola otyryp, eseptik aqparat tehnologııasyn, memlekettik jıilik resýrsyn tıimdi paıdalaný arqyly álemdik aqparattyq keńistikke erkin kirýge jol ashady. Qomaqty ekonomıkalyq paıda da ákeledi. «Efırlik keńistigimizge shetelder aqparaty keńinen engen bizge sol keńistikti ana tilindegi aqparatpen barynsha toltyrýdyń ońtaıly sáti týdy. Ony tolyq paıdalaný memlekettiń aqparat salasyndaǵy basym baǵyty bolýǵa tıis», - degen ol Úkimet basshysynyń táýlik boıy qazaqsha habar taratatyn arna ashý týraly máselesine nazar aýdardy. «Eger osy talap naqty júzege asyrylsa, rýhanı ómirimizdegi tarıhı oqıǵa bolar edi. Qazaq tiliniń jáne osy tilde taratylatyn aqparattyń qoǵamdaǵy yqpalyn arttyrýdyń budan tıimdi joly da joq. Biz osy saıası-áleýmettik mańyzy zor qadamymyz arqyly qazaq tilin qazaqstandyqtardyń ortaq tiline, el birliginiń kepiline aınaldyrý maqsatyna ólsheýsiz úles qosamyz. El Prezıdentiniń Halyqqa bıylǵy Joldaýynda atap kórsetilgen - memlekettik tildi biletin qazaqstandyqtardyń sanyn 2017 jyly - 80, 2020 jyly - 95 paıyzǵa jetkizip, on jylda mektep bitirýshilerdiń 100 paıyzy qazaq tilin bilip shyǵýyna qol jetkizý jónindegi mindettiń dáıekti júzege asýyna yqpal etemiz. Sondyqtan da quzyrly organǵa bergen tapsyrmańyzdyń júzege asyrylýyn jeke baqylaýǵa alýyńyzdy ótinemiz», - dedi depýtat.